قائم مقام صدر چوہدری لطیف اکبر کے قانون ساز اسمبلی کے انتخاب کے لیے جمع کرائے گئے کاغذات نامزدگی مسترد کر دیے گئے۔ ریٹرننگ آفیسر نے فیصلہ دیا ہے کہ قائم مقام صدر کے آئینی عہدے پر فائز رہتے ہوئے وہ قانون ساز اسمبلی کا الیکشن نہیں لڑ سکتے۔
یہ بھی پڑھیں: وزیراعظم بننا ہر رکن اسمبلی کی خواہش، میں نے کبھی عہدوں کا لالچ نہیں کیا: چوہدری لطیف اکبر
تفصیلات کے مطابق راجہ گل مجید ایڈووکیٹ نے ریٹرننگ آفیسر کے سامنے درخواست دائر کی تھی، جس میں مؤقف اختیار کیا گیا کہ چوہدری لطیف اکبر قائم مقام صدر کے آئینی منصب پر فائز ہیں، اس لیے وہ اس عہدے پر رہتے ہوئے انتخاب میں حصہ لینے کے اہل نہیں۔ اس اعتراض کو درست قرار دیتے ہوئے ریٹرننگ آفیسر نے کاغذات نامزدگی مسترد کرنے کے فیصلے کو برقرار رکھا۔
واضح رہے کہ چوہدری لطیف اکبر ریٹرننگ آفیسر کے فیصلے کے خلاف الیکشن کمیشن میں اپیل دائر کرسکتے ہیں۔
دوسری جانب چوہدری لطیف اکبر کے پی آر او مراد انجم نے کہا ہے کہ کاغذات نامزدگی پر عائد اعتراض کے خلاف قانونی چارہ جوئی کا فیصلہ کر لیا گیا ہے۔ ان کے مطابق لیگل ٹیم پہلے الیکشن کمیشن سے رجوع کرے گی، جبکہ ضرورت پڑنے پر ہائی کورٹ اور سپریم کورٹ سمیت تمام آئینی و قانونی فورمز سے بھی رجوع کیا جائے گا۔
یہ بھی پڑھیں: اسپیکرز فورم کا لطیف اکبر پر حملے کا نوٹس، 3 روز میں تحقیقات کرکے رپورٹ پیش کرنے کا حکم
مراد انجم نے کارکنان سے حوصلہ بلند رکھنے کی اپیل کرتے ہوئے کہا کہ وہ یہ انتخاب بھرپور انداز میں لڑیں گے اور قانونی و جمہوری طریقے سے اپنا مؤقف کامیابی سے پیش کریں گے۔
