پاکستان میں کینسر کے مریضوں کے لیے علاج معالجے کی سہولیات بہتر بنانے کی جانب ایک اہم قدم اٹھاتے ہوئے پاکستان اٹامک انرجی کمیشن کے ذیلی ادارے پاکستان انسٹی ٹیوٹ آف ریڈیو تھراپی اینڈ نیوکلیئرمیڈیسن (Karachi Institute of Radiotherapy and Nuclear Medicine) اور پاکستان آئی بینک سوسائٹی (Pakistan Eye Bank Society) کے درمیان مفاہمتی یادداشت (MoU) پر دستخط کیے گئے ہیں۔
مزید پڑھیں:بڑی آنت کے کینسر سے بچاؤ کے لیے نئی اسکریننگ گائیڈ لائنز، ماہرین کا بروقت تشخیص پر زور
اس معاہدے کا مقصد منہ کے کینسر اور بریسٹ کینسر کے مریضوں کے لیے مفت جراحی علاج کے موجودہ تعاون کو مزید مضبوط بنانا ہے۔ منہ کا کینسر پاکستانی مردوں جبکہ بریسٹ کینسر خواتین میں سب سے زیادہ پایا جانے والا سرطان تصور کیا جاتا ہے۔
معاہدے پر کرن (KIRAN) کے ڈائریکٹر ڈاکٹر اصغر حسین اصغر اور پی ای بی ایس اسپتال کے کینسر سرجری یونٹ کے سربراہ ڈاکٹر جہانزیب مغل نے دستخط کیے۔ تقریب کی صدارت اسلام آباد سے ورچوئل طور پر پی اے ای سی کے ممبر سائنس ڈاکٹر شکیل عباس روفی اور ڈائریکٹر جنرل نیوکلیئر میڈیسن اینڈ آنکولوجی ڈاکٹر شازیہ فاطمہ نے کی۔
مفاہمتی یادداشت کے تحت دونوں ادارے مریضوں کے علاج اور ریفرل نظام کو بہتر بنانے، منہ کے کینسر سے بچاؤ اور بریسٹ کینسر کی بروقت تشخیص کے حوالے سے عوامی آگاہی بڑھانے، جبکہ مشترکہ سائنسی اجلاسوں، ورکشاپس، تربیتی پروگراموں اور تحقیقی سرگرمیوں کو فروغ دینے کے لیے مل کر کام کریں گے۔
اس موقع پر دونوں اداروں نے پاکستان بھر میں کینسر کے مریضوں کو بہتر طبی سہولیات فراہم کرنے اور ان کے اہل خانہ کے لیے امید اور سہارا بننے کے عزم کا اعادہ کیا۔
