معروف پاکستانی اداکارہ اور کاروباری شخصیت کومل عزیز خان نے انکشاف کیا ہے کہ وہ گزشتہ ڈیڑھ سال سے اپنے خاندانی گھر سے الگ ہو کر ایک آزادانہ اور پُرسکون زندگی گزار رہی ہیں۔
ان کا کہنا ہے کہ یہ ان کی زندگی کا بہترین دور ہے تاہم خاندانی گھر سے الگ رہنے کا مقصد خاندان سے ناطہ توڑنا ہرگز نہیں ہوتا۔
مداحوں کے ساتھ سوال و جواب کا سیشن
میڈیا رپورٹ کے مطابق کومل عزیز خان نے حال ہی میں اپنے آفیشل انسٹاگرام اکاؤنٹ پر مداحوں کے لیے سوال و جواب کا ایک سیشن رکھا، جہاں انہوں نے اپنی نجی اور پیشہ ورانہ زندگی سے متعلق مختلف سوالات کے کھل کر جوابات دیے۔
خاندانی گھر سے علیحدگی اور موجودہ زندگی
سیشن کے دوران ایک مداح نے ان سے سوال کیا کہ ’کیا آپ اپنے خاندان کے ساتھ رہتی ہیں یا اکیلے زندگی گزار رہی ہیں؟‘
یہ بھی پڑھیں:کومل عزیز کی زندگی کا سب سے بڑا خوف کیا ہے، اداکارہ نے بتا دیا
اس کا جواب دیتے ہوئے اداکارہ نے بتایا کہ انہوں نے ڈیڑھ سال قبل اپنا خاندانی گھر چھوڑ دیا تھا اور اب وہ اپنی ایک بہترین دوست اور پالتو بلی کے ساتھ رہتی ہیں۔
انہوں نے مزید واضح کیا کہ ان کا خاندان ان کے قریب ہی رہائش پذیر ہے اور وہ اکثر انہیں گھر کا بنا ہوا کھانا بھی بھیجتے رہتے ہیں۔
علیحدگی کا غلط مطلب نہ لیا جائے
کومل عزیز خان نے اپنی ایک اور سوشل میڈیا پوسٹ میں اس معاملے کی مزید وضاحت کرتے ہوئے کہا کہ خاندانی گھر سے الگ رہنے کا مطلب یہ ہرگز نہیں ہوتا کہ آپ نے اپنے خاندان کو چھوڑ دیا ہے یا ان سے تعلقات ختم کر لیے ہیں۔
شادی کا معاشرتی دباؤ اور خواتین کی خودمختاری
شادی کے حوالے سے پوچھے گئے ایک سوال پر اداکارہ کا کہنا تھا کہ وہ اس معاملے میں کسی بھی قسم کے معاشرتی دباؤ کو خاطر میں نہیں لاتیں۔
مزید پڑھیں:’می ٹو‘ مہم کو پاکستان میں ذاتی مفادات کے لیے استعمال کیا گیا، کومل میر
انہوں نے نوجوان لڑکیوں کو اہم مشورہ دیتے ہوئے کہا کہ لڑکیوں کو معاشرے کے دباؤ کے آگے جھکنے کے بجائے اپنی تعلیم، مالی خودمختاری اور بنیادی حقوق کے حصول کے لیے مضبوط اور ثابت قدم ہونا چاہیے۔
