بھارت کے شہر بنگلورو کی ایک 28 سالہ خاتون نے الزام عائد کیا ہے کہ ڈیٹنگ ایپ بَمبل (Bumble) پر ملنے والے ایک شخص نے ان کی رضامندی کے بغیر نجی ویڈیوز ریکارڈ کرکے انہیں انٹرنیٹ پر شیئر کر دیا۔ پولیس نے مقدمہ درج کرکے تحقیقات شروع کردی ہیں۔
خاتون کے مطابق نومبر 2022 میں ان کی بَمبل پر ایک شخص سے شناسائی ہوئی۔ دونوں نے بعد ازاں سوشل میڈیا پر رابطہ قائم کیا اور شناخت کی تصدیق کے بعد ملاقات کا فیصلہ کیا۔ خاتون کا کہنا ہے کہ ملاقات کے بعد ملزم نے آہستہ آہستہ تمام رابطے ختم کر دیے اور انہیں سوشل میڈیا پر بلاک کر دیا۔
شکایت کے مطابق قریباً 4 سال بعد خاتون کو معلوم ہوا کہ ان کی نجی ویڈیوز ان کی اجازت کے بغیر ریڈٹ (Reddit) اور ایک بالغوں کی ویب سائٹ پر اپ لوڈ کی گئی ہیں۔ اس پر انہوں نے 19 جون کو پولیس سے رجوع کرتے ہوئے ملزم کے خلاف قانونی کارروائی کی درخواست دی۔
مزید پڑھیں:آن لائن جوے کی تشہیر کا الزام، معروف یوٹیوبر ڈکی بھائی کا 2 روزہ جسمانی ریمانڈ منظور
پولیس کا کہنا ہے کہ مقدمہ درج کرکے تحقیقات شروع کر دی گئی ہیں۔ حکام اس بات کا تعین کر رہے ہیں کہ ویڈیوز کس طرح ریکارڈ کی گئیں اور انہیں کس نے اپ لوڈ کیا۔ پولیس کے مطابق شکایت سامنے آنے کے بعد متعلقہ ویڈیوز ویب سائٹس سے ہٹا دی گئی ہیں، جبکہ ملزم کی تلاش جاری ہے۔
