سابق وزیراعظم آزاد کشمیر سردار تنویر الیاس خان نے پیپلز پارٹی کی بنیادی رکنیت سے استعفیٰ دے دیا۔
ذرائع کے مطابق سردار تنویر الیاس خان نے اپنا استعفیٰ چیئرمین پیپلز پارٹی بلاول بھٹو زرداری کو ارسال کر دیا ہے۔
گزشتہ 3 روز کے دوران پاکستان پیپلز پارٹی کی مرکزی قیادت، گورنر پنجاب، گورنر خیبرپختونخوا، چوہدری ریاض اور دیگر رہنماؤں نے سردار تنویر الیاس خان کو منانے کی بھرپور کوشش کی، تاہم یہ کوششیں کامیاب نہ ہو سکیں۔
سابق وزیراعظم آزاد کشمیر سردار تنویر الیاس خان نے پارٹی کی بنیادی رکنیت سے استعفیٰ دے دیا۔سردار تنویر الیاس خان نے اپنا استعفیٰ چیئرمین بلاول بھٹو زرداری کو ارسال کر دیا ہے۔
— Waqar Satti 🎖️🇵🇰 (@waqarsatti) July 1, 2026
ذرائع کے مطابق آزاد کشمیر کے آئندہ انتخابات کے لیے پارٹی ٹکٹوں کی تقسیم پر اختلافات کے بعد سردار تنویر الیاس خان نے پیپلز پارٹی سے علیحدگی کا فیصلہ کیا۔
انہوں نے حلقہ وسطی باغ، پاچھیوٹ اور نیلم سے پارٹی ٹکٹ کے لیے پارلیمانی بورڈ کو درخواست بھی دی تھی۔
اسی دوران وزیر حکومت علی شان سونی نے بھی پاکستان پیپلز پارٹی کی بنیادی رکنیت اور وزارت سے استعفیٰ دے دیا ہے۔
ذرائع کے مطابق سردار تنویر الیاس خان اپنے سیاسی ساتھیوں سمیت پاکستان پیپلز پارٹی سے الگ ہوگئے ہیں، جبکہ اپنے آئندہ سیاسی لائحہ عمل کا اعلان آئندہ 2 روز میں کریں گے۔
ذرائع کا مزید کہنا ہے کہ سردار تنویر الیاس خان استحکام پاکستان پارٹی میں شمولیت اختیار کریں گے یا آزاد حیثیت میں ایک بڑے گروپ کی قیادت کرتے ہوئے انتخابات میں حصہ لیں گے۔
دریں اثنا سردار تنویر الیاس خان کے ترجمان نے بھی ان کے پاکستان پیپلز پارٹی کی بنیادی رکنیت سے استعفیٰ دینے کی تصدیق کردی ہے۔
