خیبرپختونخوا کے ضلع سوات میں سیاحوں سے بھری کشتی الٹنے کے نتیجے میں ایک ہی خاندان کے 5 افراد جاں بحق جبکہ 4 لاپتا ہو گئے ہیں۔
پولیس ذرائع کے مطابق کشتی الٹنے کا افسوسناک واقعہ سوات کے مشہور سیاحتی علاقے کالام میں سیف اللہ جھیل کے مقام پر پیش آیا، جہاں سیاح کشتی میں بیٹھ کر جھیل کی سیر کررہے تھے۔
پولیس نے بتایا کہ ابتدائی تحقیقات کے مطابق کشتی میں 9 افراد سوار تھے، جو سیر و تفریح کے لیے کالام آئے تھے اور ان کا تعلق ایک ہی خاندان سے تھا۔
پولیس کے مطابق واقعے کی اطلاع ملتے ہی مقامی رضاکاروں نے ریسکیو آپریشن شروع کردیا، جبکہ متعلقہ اداروں کے اہلکار بھی موقع پر پہنچ گئے۔
پولیس نے بتایا کہ 5 افراد کی لاشیں مہوڈنڈ کے مقام سے نکال لی گئی ہیں، جبکہ 4 افراد تاحال لاپتا ہیں جن کی تلاش جاری ہے۔ تاہم اندھیرا ہونے کے باعث امدادی کارروائیوں میں مشکلات پیش آ رہی ہیں۔
یاد رہے کہ محکمہ موسمیات نے ملک بھر میں بارشوں کی پیش گوئی کی ہے، جس کے بعد پی ڈی ایم اے خیبرپختونخوا نے بالائی علاقوں میں شدید بارشوں اور گلیشیئر پھٹنے کے خدشے کے پیش نظر الرٹ جاری کر دیا ہے۔
الرٹ میں تمام ضلعی انتظامیہ کو ضروری اقدامات کرنے اور دریا کے کنارے آباد آبادیوں کو محفوظ مقامات پر منتقل کرنے کی ہدایت کی گئی ہے۔
دوسری جانب گرمی کی شدت میں اضافے کے بعد ٹورازم اتھارٹی خیبر پختونخوا نے بھی سیاحوں کو احتیاط برتنے کی ہدایت کی ہے۔
ٹورازم اتھارٹی کے مطابق گرمی میں اضافے کے باعث دریاؤں کے بہاؤ میں تیزی آ گئی ہے، جس سے حادثات اور جانی نقصان کا خدشہ بڑھ گیا ہے۔
