انٹرنیشنل کرکٹ کونسل (آئی سی سی) نے کھلاڑیوں کی نئی درجہ بندی جاری کردی ہے، جس میں آسٹریلیا کے ٹریوس ہیڈ پہلی بار ٹیسٹ کرکٹ کے نمبر ون بلے باز جبکہ بھارت کے ایشان کشن ٹی20 کے نمبر ون بلے باز بن گئے ہیں۔
ٹریوس ہیڈ نے انگلینڈ کے جو روٹ کو پیچھے چھوڑتے ہوئے ٹیسٹ بیٹنگ میں پہلی پوزیشن حاصل کی، جبکہ جو روٹ تیسرے نمبر پر چلے گئے۔ سری لنکا کے دھننجایا ڈی سلوا 6 درجے ترقی کے بعد 21 ویں نمبر پر پہنچ گئے، ویسٹ انڈیز کے روسٹن چیز 14 درجے ترقی کے ساتھ 79 ویں نمبر پر آگئے ہیں۔
یہ بھی پڑھیں: آئی سی سی رینکنگز میں بہتری، پاکستانی ٹیم چوتھے نمبر پر آگئی
ٹیسٹ بولنگ درجہ بندی میں ویسٹ انڈیز کے شمر جوزف 9 درجے ترقی کر کے 14 ویں، کیمار روچ 4 درجے ترقی کے بعد 17 ویں، جبکہ زمبابوے کے بلیسنگ مزاربانی 6 درجے ترقی کر کے 19 ویں نمبر پر پہنچ گئے۔
ٹی20 بیٹنگ درجہ بندی میں بھارت کے ایشان کشن نے پہلی بار نمبر ون پوزیشن حاصل کرلی۔ انہوں نے اپنے ہم وطن ابھیشیک شرما کو پیچھے چھوڑ دیا، جن کی تقریباً 11 ماہ تک جاری رہنے والی حکمرانی ختم ہو گئی۔
ایشان کشن اس کامیابی کے بعد ویرات کوہلی، سوریا کمار یادیو اور ابھیشیک شرما کے بعد ٹی20 میں نمبر ایک بننے والے چوتھے بھارتی بلے باز بن گئے ہیں۔
یہ بھی پڑھیں: پاکستانی کرکٹ کے نئے ستارے جگمگانے لگے، ٹی20 رینکنگ میں نمایاں ترقی
آئی سی سی کے مطابق ایشان کشن کی یہ ترقی رواں سال ٹی20 ورلڈ کپ میں شاندار کارکردگی کی بدولت ہوئی، جہاں انہوں نے 317 رنز بنائے اور پاکستان کے خلاف بہترین اننگز کھیلنے پر میچ کے بہترین کھلاڑی کا اعزاز بھی حاصل کیا تھا۔
درجہ بندی میں پاکستان کے صاحبزادہ فرحان تیسرے نمبر پر برقرار ہیں، جبکہ آئرلینڈ کے لورکن ٹکر اور راس ایڈیر نے بھی نمایاں ترقی کی ہے۔
