جڑواں شہروں میں وقفے وقفے سے بارش، واسا ہائی الرٹ، نشیبی علاقوں سے پانی کی نکاسی جاری

جڑواں شہروں راولپنڈی اور اسلام آباد میں وقفے وقفے سے بارش کا سلسلہ جاری ہے، جس کے پیش نظر واسا راولپنڈی کو ہائی الرٹ کردیا گیا ہے۔

منیجنگ ڈائریکٹر واسا عزیز اللہ خان نے کہا ہے کہ بارش کی صورتحال سے نمٹنے کے لیے تمام ضروری انتظامات مکمل کر لیے گئے ہیں اور متعلقہ عملہ مکمل طور پر متحرک ہے۔

ایم ڈی واسا کے مطابق نشیبی علاقوں میں واسا کا عملہ اور ہیوی مشینری تعینات کردی گئی ہے، جبکہ لیاقت باغ، کمیٹی چوک انڈر پاس، مری روڈ اور صادق آباد کے نشیبی علاقوں میں نکاسی آب کا عمل بلا تعطل جاری ہے تاکہ شہریوں کو کسی قسم کی دشواری کا سامنا نہ کرنا پڑے۔

انہوں نے بتایا کہ نالہ لئی کی مسلسل مانیٹرنگ کی جا رہی ہے اور اس میں پانی کا بہاؤ معمول کے مطابق ہے، جس کے باعث فی الحال کسی قسم کی تشویشناک صورتحال نہیں ہے۔

ایم ڈی واسا نے بارش کے تازہ ترین اعداد و شمار بھی جاری کیے، جن کے مطابق سیدپور میں 10 ملی میٹر، گولڑہ میں 37 ملی میٹر، بوکرہ میں 12 ملی میٹر، پی ایم ڈی میں 6 ملی میٹر، شمس آباد میں 5 ملی میٹر، کچہری میں 10 ملی میٹر، پیرودھائی میں 9 ملی میٹر، گوالمنڈی میں 8 ملی میٹر جبکہ نیو کٹاریاں میں 9 ملی میٹر بارش ریکارڈ کی گئی ہے۔

ترجمان واسا کے مطابق ایم ڈی واسا کی ہدایت پر تمام فیلڈ افسران نکاسی آب کے کام کی خود نگرانی کررہے ہیں تاکہ بارش کے دوران پانی کی بروقت نکاسی کو یقینی بنایا جا سکے۔

واسا نے شہریوں سے اپیل کی ہے کہ وہ نالوں اور گٹروں میں کچرا پھینکنے سے گریز کریں اور گٹروں کے ڈھکن نہ کھولیں تاکہ نکاسی آب کا نظام مؤثر انداز میں کام کرتا رہے۔

ایم ڈی واسا نے کہاکہ کسی بھی ہنگامی صورتحال کی صورت میں شہری فوری طور پر واسا کی ہیلپ لائن پر رابطہ کریں۔