وزیراعلیٰ پنجاب مریم نواز شریف نے باغبانپورہ میں نجی اسکول میں قائم سمر کیمپ کی چھت گرنے کے واقعے کا فوری نوٹس لیتے ہوئے کمشنر لاہور اور ڈی جی ریسکیو سے فوری رپورٹ طلب کرلی ہے۔
یہ بھی پڑھیں: باغبانپورہ میں اسکول کی چھت گر گئی، 10 سالہ بچہ جاں بحق، 4 مزدور زخمی
وزیراعلیٰ نے حادثے میں ایک بچے کے جاں بحق ہونے پر گہرے دکھ اور افسوس کا اظہار کرتے ہوئے سوگوار خاندان سے دلی تعزیت کی۔ انہوں نے 10 سے زائد بچوں کو ملبے سے بحفاظت نکالنے پر ریسکیو 1122 کی ٹیموں کو شاباش بھی دی۔
مریم نواز شریف نے ریسکیو آپریشن کو تیز ترین بنانے اور ملبے تلے دبے بچوں کی بحفاظت برآمدگی یقینی بنانے کی ہدایت کرتے ہوئے کہا کہ ریسکیو آپریشن میں ایک سیکنڈ کی بھی تاخیر برداشت نہیں کی جائے گی۔
یہ بھی پڑھیں: یہ ننھے پھول قوم کا مستقبل تھے، نواز شریف کا ٹیوشن سینٹر سانحہ میں 14 بچوں کی موت پر اظہار رنج و غم
وزیراعلیٰ نے زخمی بچوں اور دیگر متاثرہ افراد کو بہترین اور فوری طبی سہولیات فراہم کرنے کا حکم دیا، جبکہ غفلت یا غیر معیاری تعمیرات کے ذمہ داروں کے خلاف سخت قانونی کارروائی کرنے کا بھی فیصلہ کیا۔
انہوں نے ہدایت کی کہ صوبے بھر میں گنجان آباد علاقوں میں قائم ایسے تمام سکولوں کی عمارتوں کا فوری سیفٹی آڈٹ کیا جائے تاکہ مستقبل میں اس نوعیت کے افسوسناک واقعات سے بچا جاسکے۔
