عالمی شہرت یافتہ پاپ گلوکارہ میڈونا نے کافی عرصے بعد اپنا نیا البم کنفیشنز 2 ریلیز کر دیا ہے جس میں خاندانی جذبات، ذاتی تجربات اور مبینہ طور پر سابق شوہر پر طنزیہ اشاروں کی بازگشت سنی جا رہی ہے۔
یہ بھی پڑھیں: معروف گلوکارہ میڈونا کے نایاب ملبوسات اسٹیج سے پراسرار طور پر غائب، واپس لانے والے کے لیے انعام کا اعلان
میڈونا نے البم کی باضابطہ رونمائی جمعہ 3 جولائی کو لندن میں ایک منفرد لانچ پارٹی کے دوران کی جہاں انہوں نے معروف ڈی جیز اسٹیورٹ پرائس اور اپنی بیٹی لورڈیس کے ساتھ اسٹیج شیئر کیا۔ تقریب کو مداحوں اور موسیقی کے حلقوں میں غیر معمولی قرار دیا جا رہا ہے۔
البم میں مجموعی طور پر 16 گانے بیزار، فریجائل، مائی سنز آر مائی سیویئر (فٹ۔ اسٹروماے)، ریڈ مائی لِپس (فٹ۔ فیڈ)، بیٹریل، لو وِداؤٹ ورڈز، ایل۔ای۔ایس۔ گرل، ون اسٹیپ اَوے، دی ٹیسٹ (فٹ۔ لولا لیون)، برنگ یور لو (فٹ۔ سابرینا کارپینٹر)، آئی فیل سو فری، اسکول، لو سینسیشن، ڈانسٹیریا، ایوری تھنگ اور گُڈ فار دی سول شامل ہیں۔
البم کی ریلیز سے قبل ہی اس کے ممکنہ مواد پر سوشل میڈیا پر قیاس آرائیاں جاری تھیں، اور اب مداحوں کا ماننا ہے کہ کئی گانوں میں میڈونا نے اپنی ذاتی زندگی اور ماضی کے تعلقات کی جھلک پیش کی ہے۔
خصوصاً گانے بیزار کے حوالے سے مداحوں کا خیال ہے کہ اس میں میڈونا نے اپنی مرحومہ سوتیلی والدہ جوآن کلیر سِکونے کو خراجِ عقیدت پیش کیا ہے جنہوں نے ان کی پرورش میں اہم کردار ادا کیا تھا۔ جوآن کا انتقال ستمبر 2022 میں کینسر کے باعث 81 سال کی عمر میں ہوا تھا۔
مزید پڑھیے: میڈونا کی پوپ لیو سے اپیل: غزہ کا فوری دورہ کریں، بچے متاثر ہو رہے ہیں
گانے کی لائنز میں “دِس اِز اے سٹوری آف بِیٹریل…” اور “یو نیور ٹیک مائی مدرز پلیس” جیسے الفاظ کو جذباتی خراجِ عقیدت کے طور پر دیکھا جا رہا ہے۔
دوسری جانب بعض مداحوں کے مطابق اسی البم کے ایک اور گانے میں میڈونا نے اپنے سابق شوہر اداکار شان پین کی جانب بھی مبینہ اشارہ کیا ہے جہاں ایک ہالی ووڈ شخصیت کا ذکر کیا گیا ہے جس کی ’ڈیپ بلیو آئیز‘ اور تیز رفتار گاڑی چلانے کے حوالے سے بات کی گئی ہے۔
مزید پڑھیں: گلوکارہ میڈونا کے مداح نے 18 ٹیٹو بنوا کر عالمی ریکارڈ بنا ڈالا
اگرچہ میڈونا نے ان حوالوں کی براہ راست تصدیق نہیں کی تاہم شائقین کے مطابق البم ان کی ذاتی زندگی کے مختلف پہلوؤں کی عکاسی کرتا ہے۔
