راولپنڈی کے تاریخی راجہ بازار کی تزئین و آرائش کا منصوبہ مکمل ہونے کے بعد بازار کو عوام کے لیے کھول دیا گیا ہے۔ منصوبے کے تحت بجلی، گیس، ٹیلی فون اور انٹرنیٹ کی تاریں زیرِ زمین منتقل کی گئی ہیں، جبکہ فٹ پاتھ، جدید لائٹس، یکساں سائن بورڈز، بیٹھنے کی جگہیں، پلانٹرز اور عمارتوں کے فرنٹ ایلیویشن کو بھی بہتر بنایا گیا ہے۔ حکومت کا کہنا ہے کہ اس منصوبے کا مقصد تاریخی ورثے کو محفوظ رکھتے ہوئے شہریوں اور تاجروں کو بہتر سہولیات فراہم کرنا ہے۔
تزئین و آرائش کے بعد فوارہ چوک سے ڈنگی کھوئی چوک تک کا حصہ پیدل چلنے والوں کے لیے مختص کیا گیا ہے، جہاں گاڑیوں اور موٹرسائیکلوں کے داخلے پر پابندی ہوگی۔ انتظامیہ کے مطابق اس اقدام سے نہ صرف بازار کا تاریخی حسن بحال ہوگا بلکہ ٹریفک کے دباؤ میں بھی کمی آئے گی۔ دوسری جانب عوام نے بھی اس منصوبے کو خوش آئند قرار دیا ہے۔ شہریوں کا کہنا ہے کہ پہلے رش، ٹریفک اور بے ترتیبی کے باعث فیملیز یہاں آنے سے کتراتی تھیں، لیکن اب بہتر ماحول میں آرام سے خریداری کی جا سکتی ہے۔
بعض لوگوں نے کہا کہ بازار کی شکل ہی بدل گئی ہے اور اب یہ جگہ پہلے سے کہیں زیادہ خوبصورت اور منظم نظر آ رہی ہے۔ کچھ شہریوں کا یہ بھی کہنا تھا کہ اب تو یہ جگہ پہچان میں ہی نہیں آ رہی۔ مجموعی طور پر لوگوں نے اس تبدیلی کو مثبت اور قابلِ تعریف قرار دیا ہے۔
