دنیا کے سب سے بڑے کھیل ’فیفا ورلڈ کپ 2026‘ کا دوسرا ناک آؤٹ مرحلہ (راؤنڈ آف 16) آج سے شروع ہو رہا ہے، جہاں عالمی ٹرافی کے حصول کی جنگ اب مزید فیصلہ کن موڑ پر پہنچ گئی ہے۔
گروپ اسٹیج اور ’راؤنڈ آف 32‘ کی کٹھن آزمائشوں سے سرخرو ہونے کے بعد دنیا کی بہترین 16 ٹیمیں اب پری کوارٹر فائنل میں ایک دوسرے کے خلاف بقا کی جنگ لڑیں گی۔
اگلے مرحلے میں پہنچنے والی خوش نصیب ٹیمیں
ٹورنامنٹ کے سنسنی خیز مقابلوں کے بعد تینوں میزبان ممالک امریکا، کینیڈا اور میکسیکو اگلے مرحلے میں جگہ بنانے میں کامیاب رہے ہیں۔
یہ بھی پڑھیں:فیفا ورلڈ کپ: مصر پہلی بار ناک آؤٹ مرحلہ جیت گیا، ارجنٹینا کی اعصاب شکن کامیابی
ان کے علاوہ فٹ بال کی سپر پاورز برازیل، پیراگوئے، مراکش، ناروے، فرانس، انگلینڈ، بیلجیم، اسپین، پرتگال، سوئٹزرلینڈ، مصر، ارجنٹینا اور کولمبیا نے بھی شاندار کارکردگی کا مظاہرہ کرتے ہوئے پری کوارٹر فائنل کے لیے کوالیفائی کر لیا ہے۔
آج کے افتتاحی معرکے
پری کوارٹر فائنل کے سنسنی خیز مقابلوں کا آغاز آج سے ہو رہا ہے، جہاں پہلے میچ میں کینیڈا کی ٹیم مراکش کے مدمقابل ہو گی۔
آج ہی کھیلے جانے والے دوسرے بڑے میچ میں پیراگوئے اور سابق عالمی چیمپیئن فرانس کی ٹیمیں آمنے سامنے ہوں گی، جس میں فٹ بال شائقین کو سخت مقابلے کی توقع ہے۔
5 اور 6 جولائی کا شیڈول اور ہائی وولٹیج میچز
اتوار 5 جولائی کو روایتی حریف اور فٹ بال کی دنیا کے دو بڑے نام برازیل اور ناروے ایک دوسرے کے خلاف میدان میں اتریں گے، جبکہ اسی روز میزبان میکسیکو کا مقابلہ مضبوط حریف انگلینڈ سے ہوگا۔
مزید پڑھیں:فیفا ورلڈ کپ: میکسیکو 40 سال بعد ناک آؤٹ مرحلہ جیت گیا، فرانس اور ناروے بھی پری کوارٹر فائنل میں
اگلے روز یعنی 6 جولائی کو ٹورنامنٹ کا سب سے بڑا اور اعصاب شکن معرکہ دیکھنے کو ملے گا جب پرتگال اور اسپین کی ٹیمیں ٹکرائیں گی۔ اسی روز میزبان امریکا کا سامنا یورپ کی ریڈ ڈیولز ’بیلجیم‘ سے ہوگا۔
کوارٹر فائنل کی آخری جنگ
راؤنڈ آف 16 کے آخری 2 مقابلے 7 جولائی کو کھیلے جائیں گے، جہاں دفاعی چیمپیئن ارجنٹینا کا مقابلہ مصر سے ہوگا، جبکہ آخری میچ میں سوئٹزرلینڈ کی ٹیم کولمبیا کے چیلنج کا سامنا کرے گی۔
ان تمام مقابلوں میں فتح حاصل کرنے والی ٹیمیں براہِ راست کوارٹر فائنل میں جگہ پکی کریں گی، جبکہ ہارنے والی ٹیموں کا ورلڈ کپ کا سفر یہیں تمام ہو جائے گا۔
