پاکستان کے کامیاب ترین بلے باز بابر اعظم ایک بار پھرقومی ٹیم کی قیادت کی دوڑ میں شامل ہوگئے ہیں اور انہیں ٹیسٹ ٹیم کی کپتانی دیے جانے کا امکان ہے۔
پاکستان کرکٹ ٹیم کی سلیکشن کمیٹی نے ٹیسٹ کپتان کے تقرر کے لیے چیئرمین پی سی بی کو بابر اعظم کا نام بھیج دیا ہے جس کی ایک یا دو روز تک منظوری ملنے کا امکان ہے۔
مزید پڑھیں: بابر اعظم کا مستقبل کیا ہوگا؟ ٹیسٹ کپتان شان مسعود نے واضح کردیا
پاکستان کرکٹ بورڈ کے ذرائع نے وی نیوز کو تصدیق کی ہے کہ بابر اعظم دورہ ویسٹ انڈیز میں قومی ٹیسٹ ٹیم کی قیادت کریں گے، اور ان کے نام کا اعلان دورہ کے لیے طلب کیے گئے تربیتی کیمپ سے قبل کردیا جائے گا۔
پاکستان کرکٹ بورڈ نے شان مسعود کی جگہ ٹیسٹ ٹیم کی قیادت کے لیے ون ڈے کپتان سلمان علی آغا، عبداللہ شفیق اور امام الحق کے ناموں پر بھی غور کیا لیکن سلیکشن کمیٹی ان ناموں پر متفق نہیں ہو سکی۔
قومی ٹیسٹ ٹیم کے موجودہ کپتان شان مسعود جو نومبر 2023 سے قیادت کررہے ہیں خاطر خواہ کارکردگی نہیں دکھا سکے۔
ان کی کپتانی میں پاکستان کو ہوم سیریز میں بھی ناکامی ہوئی، جن میں بنگلہ دیش سے وائٹ واش بھی شامل ہے، اس کے علاوہ آسٹریلیا اور افریقہ سے بھارت شکستیں بھی شان مسعود کے حصے میں آئی ہیں۔
شان مسعود نے پاکستان کی 16 ٹیسٹ میچز میں کپتانی کی جس میں صرف 4 میں فتح نصیب ہوئی جبکہ 12 میں شکست ہوئی۔
مزید پڑھیں: شان مسعود کی کپتانی کا معاملہ پھر زیر بحث، پاکستان ٹیسٹ ٹیم قیادت کے بحران سے دوچار
شان مسعود کے مقابلے میں بابر اعظم زیادہ کامیاب ٹیسٹ کپتان ثابت ہوئے ہیں جن کی سربراہی میں پاکستان نے 20 ٹیسٹ میچز کھیلے، جن میں سے 10 میں فتح حاصل کی، 6 میں شکست ہوئی اور 4 میچز بغیر کسی نتیجے کے ختم ہوئے۔ بابر اعظم کی بطور کپتان فتح کی شرح شان مسعود کے مقابلے میں کہیں بہتر ہے۔
