امریکا نے اپنی آزادی کے 250 سال مکمل ہونے کا جشن دنیا بھر میں مختلف تقریبات کے ذریعے منایا، جبکہ پاکستان میں بھی اس تاریخی موقع پر خیرسگالی اور دوستی کی ایک منفرد جھلک دیکھنے میں آئی۔
امریکی سفارت خانے کی جانب سے پاکستان کی 2 نمایاں قومی تاریخی یادگاروں اسلام آباد کے پاکستان مونومنٹ اور لاہور کے شاہی قلعے کو امریکی قومی پرچم کے رنگوں، یعنی سرخ، سفید اور نیلی روشنیوں سے منور کیا گیا۔
یہ بھی پڑھیں: واشنگٹن میں 250ویں یومِ آزادی کی تقریب، ٹرمپ کا مخالفت کے باوجود خطاب
یہ خصوصی روشنیوں کا اہتمام امریکا کی آزادی کی 250 سالہ تقریبات کے سلسلے میں شروع کی گئی ایک عالمی مہم کا حصہ تھا، جس کے تحت مختلف ممالک میں امریکی تاریخ اور آزادی کے اس اہم سنگِ میل کو منفرد انداز میں خراجِ تحسین پیش کیا گیا۔
Happy 4th of July! Pakistan's iconic national monuments, the Pakistan Monument and Lahore Fort, were beautifully illuminated in our great red, white, and blue to celebrate America’s 250 incredible years of freedom and our bright future. This tremendous visual tribute joined a… pic.twitter.com/6DFkXLTQ47
— U.S. Embassy Islamabad (@usembislamabad) July 4, 2026
سوشل میڈیا پلیٹ فارم ایکس پر امریکی سفارت خانے نے اپنے پیغام میں اس موقع کو صرف جشنِ آزادی تک محدود نہیں رکھا بلکہ پاکستان اور امریکا کے درمیان تقریباً 80 برس پر محیط تعلقات کو بھی اجاگر کیا۔
بیان کے مطابق دونوں ممالک کی شراکت داری باہمی خوشحالی، اقتصادی تعاون اور علاقائی سلامتی جیسے مشترکہ اہداف پر استوار رہی ہے، اور مستقبل میں بھی اس تعاون کو مزید مضبوط بنانے کے عزم کا اظہار کیا گیا۔
مزید پڑھیں: امریکا کا یوم آزادی: صدر نے 4 جولائی کو جشن منانے سے انکار کیوں کیا؟
پاکستان مونومنٹ اور لاہور قلعے پر امریکی پرچم کے رنگوں کی روشنی نہ صرف اس عالمی مہم کا حصہ تھی بلکہ یہ دونوں ممالک کے درمیان سفارتی تعلقات اور باہمی احترام کی علامت بھی بن گئی۔
تاریخی اور ثقافتی اہمیت کی حامل ان عمارتوں کو امریکی قومی رنگوں میں روشن کرنا اس بات کا اظہار تھا کہ پاکستان اور امریکا اپنے دیرینہ تعلقات کو مستقبل میں بھی مزید مستحکم دیکھنا چاہتے ہیں۔
امریکا ہر سال 4 جولائی کو اپنا یومِ آزادی مناتا ہے، تاہم اس سال کی تقریبات کو خصوصی اہمیت حاصل رہی کیونکہ ملک نے آزادی کے 250 سال مکمل ہونے کا سنگِ میل عبور کیا۔
