امریکہ میں 4 جولائی کو یوم آزادی پر تعطیل ہے لیکن آپ کو یہ جان کر حیرانی ہو گی کہ امریکا کے بانیان میں شامل صدر جان ایڈم نے 4 جولائی کو ملک کے قیام کا جشن منانے سے انکار کر دیا تھا۔ آخر انہوں نے ایسا کیوں کیا تھا؟
امریکا کے پہلے صدر جارج واشنگٹن سے لے کر موجودہ صدر جو بائیڈن تک ملک کے ہر صدر نے ملک کی سالگرہ 4 جولائی کو منائی ہے جس میں واحد استثنیٰ جان ایڈمز ہیں جنہوں نے 4 جولائی کو تعطیل اور جشن سے انکار کر دیا تھا کیوں کہ انہیں لگا کہ 2 جولائی حقیقی یوم آزادی ہے۔
بات یہ ہے کہ 2 جولائی 1776 کو کانٹی نینٹل کانگریس نے آزادی کی قرارداد کے حق میں ووٹ دیا تھا۔ آزادی کا اعلان اس کے بعد 2 دن تک باضابطہ طور پر نہیں کیا گیا تھا۔
4 جولائی 1776 کو تھامس جیفرسن، بینجمن فرینکلن، جان ایڈمز، فلپ لیونگسٹن اور راجر شرمین کی طرف سے تیار کردہ آزادی کے اعلان کو فلاڈیلفیا میں کانٹی نینٹل کانگریس نے منظور کیا تھا۔
تاہم جان ایڈمز اپنے فیصلے میں اتنے اٹل تھے کہ انہوں نے ملک کے دوسرے صدر کی حیثیت سے خدمات انجام دیتے ہوئے بھی اس موقعے پر جشن اور دیگر تقریبات میں شرکت کے دعوت ناموں کو ٹھکرا دیا تھا۔
جان ایڈمز اور تھامس جیفرسن دونوں ہی آزادی کے اعلان کے بنیادی مصنف تھے۔ دونوں کی وفات دستاویز کی باضابطہ منظوری کی 50 ویں سالگرہ پر یعنی 4 جولائی 1826 کو ہوئی تھی۔
