حماس کی جانب سے ایمرجنسی کمیٹی کی تحلیل، غزہ بورڈ آف پیس کا ردعمل سامنے آگیا

غزہ میں گزشتہ قریباً 20 برس سے انتظامی معاملات سنبھالنے والی حماس نے اپنی ایمرجنسی کمیٹی ختم کرنے کا اعلان کردیا ہے، جس کے نتیجے میں سول انتظام سنبھالنے کے لیے نئی شہری انتظامی کمیٹی کے قیام کی راہ ہموار ہوگئی ہے۔

غزہ بورڈ آف پیس نے حماس کی جانب سے ’ایمرجنسی کمیٹی‘ کی تحلیل کے اعلان کا نوٹس لیتے ہوئے کہا ہے کہ اس پیشرفت کا جائزہ وعدوں کے بجائے عملی اقدامات کی بنیاد پر لیا جائے گا تاکہ غزہ کے عوام کی بنیادی ضروریات پوری کی جا سکیں۔

We have taken note of the announcement today regarding the dissolution of the “Emergency Committee” in Gaza. Ultimately, our assessment will be guided by actions, not promises, to meet the critical needs of the people of Gaza. Decisions must be comprehensive with respect to the…

— Board of Peace (@BoardOfPeace) July 6, 2026

’ایکس‘ پر جاری بیان میں کہا گیا ہے کہ مستقبل کے فیصلے ایسے جامع اقدامات پر مبنی ہونے چاہییں جو غزہ میں حکمرانی، سیکیورٹی اور انتقالِ اقتدار سے متعلق روڈ میپ کے تقاضوں سے ہم آہنگ ہوں۔

روڈ میپ پر مذاکرات کی کامیابی کی امید

غزہ بورڈ آف پیس نے کہاکہ اسے اس روڈ میپ پر جاری مذاکرات کے کامیاب اختتام کی توقع ہے، جن میں ان عملی طریقہ کار پر بھی اتفاق شامل ہے جو نیشنل کمیٹی فار دی ایڈمنسٹریشن آف غزہ کو مکمل حکومتی اختیارات سنبھالنے کے قابل بنائیں گے۔

’ایک اختیار، ایک قانون، ایک ہتھیار‘ بنیادی اصول قرار

بیان میں کہا گیا کہ بنیادی اصول ’ایک اختیار، ایک قانون اور ایک ہتھیار‘ ہے۔ اس کا مطلب یہ ہے کہ جامع غزہ امن منصوبے اور اقوام متحدہ کی سلامتی کونسل کی قرارداد 2803 کے مطابق تمام ہتھیار نیشنل کمیٹی فار دی ایڈمنسٹریشن آف غزہ کے کنٹرول میں ہوں۔

اختیارات کی حقیقی منتقلی پر زور

غزہ بورڈ آف پیس نے زور دیا کہ اختیارات کی حقیقی منتقلی ایسی ہونی چاہیے جس کے تحت نیشنل کمیٹی فار دی ایڈمنسٹریشن آف غزہ مکمل خودمختاری کے ساتھ اپنی ذمہ داریاں ادا کر سکے، جس میں اسے سونپے گئے انتظامی اور حکمرانی سے متعلق فیصلے آزادانہ طور پر کرنے کا اختیار بھی شامل ہو۔

مزید پڑھیں: حماس نے 2 دہائیوں بعد غزہ حکومت سے دستبرداری کا اعلان کردیا

واضح رہے کہ امریکی صدر ڈونلڈ ٹرمپ نے گزشتہ برس غزہ میں قیام امن کے لیے 20 نکاتی منصوبے کا اعلان کیا تھا، جس کے پہلے مرحلے میں تمام یرغمالیوں کی رہائی شامل تھی اور اس پر عملدرآمد مکمل ہوگیا ہے۔