صدرِ مملکت آصف علی زرداری نے نشانِ حیدر یافتہ حوالدار لالک جان شہید کی برسی کے موقع پر ان کی عظیم قربانی، شجاعت اور حب الوطنی کو خراجِ عقیدت پیش کیا ہے۔
صدرِ مملکت نے اپنے پیغام میں کہا کہ شہداء کا خون پاکستان کے محفوظ، مضبوط اور باوقار مستقبل کی ضمانت ہے۔ انہوں نے کہا کہ شہداء کی عظیم روایات ہماری قومی شناخت کا قابلِ فخر سرمایہ ہیں، جنہیں ہمیشہ یاد رکھا جائے گا۔
آصف علی زرداری نے کہا کہ حوالدار لالک جان شہید کا عزم، بہادری اور جذبۂ حب الوطنی آنے والی نسلوں کے لیے مشعلِ راہ ہے۔ انہوں نے وطن کے دفاع کے لیے بے مثال جرات، استقامت اور فرض شناسی کا مظاہرہ کرتے ہوئے تاریخ میں ایک روشن مثال قائم کی۔
صدرِ مملکت نے کہا کہ پاکستان کے شہداء کی قربانیاں ملک کی سلامتی، خودمختاری اور قومی وقار کی مضبوط بنیاد ہیں۔ قوم اپنے بہادر سپوتوں کی لازوال قربانیوں کو ہمیشہ عزت، احترام اور فخر کے ساتھ یاد رکھے گی۔
انہوں نے کہا کہ حوالدار لالک جان شہید جیسے عظیم جانبازوں کی قربانیاں قوم کے حوصلے کو مضبوط کرتی ہیں اور ملک کے دفاع کے عزم کو مزید مستحکم بناتی ہیں۔
وزیراعظم محمد شہباز شریف نے کارگل معرکے کے عظیم ہیرو حوالدار لالک جان شہید، نشانِ حیدر، کو ان کے یومِ شہادت پر خراجِ عقیدت پیش کرتے ہوئے کہا ہے کہ وطن کے دفاع کے لیے ان کی بے مثال بہادری اور قربانی ہمیشہ قوم کے لیے مشعلِ راہ رہے گی۔
وزیراعظم نے اپنے پیغام میں کہا کہ کارگل کے معرکے میں حوالدار لالک جان شہید کی شجاعت، بہادری اور وطن کے دفاع کے لیے دی جانے والی عظیم قربانی پوری قوم کے لیے باعثِ فخر ہے۔
انہوں نے کہا کہ شدید زخمی ہونے کے باوجود دشمن کے سامنے ڈٹے رہنا حوالدار لالک جان شہید کے غیر معمولی عزم، حوصلے اور جذبۂ حب الوطنی کا واضح ثبوت ہے۔
وزیراعظم نے کہا کہ قوم اپنے اس عظیم سپوت اور پاکستان کے تمام شہداء کی لازوال قربانیوں کو کبھی فراموش نہیں کرے گی۔ انہوں نے کہا کہ شہداء کی قربانیاں ملک کے دفاع اور سلامتی کے لیے ہمیشہ یاد رکھی جائیں گی۔
