الیکشن کمیشن آف پاکستان نے خیبرپختونخوا اور وفاقی دارالحکومت اسلام آباد میں بلدیاتی انتخابات کے انعقاد سے متعلق کیس کی سماعت کرتے ہوئے متعلقہ حکام کو ضروری اقدامات جلد مکمل کرنے کی ہدایت کردی۔
سماعت کے دوران خیبرپختونخوا کے چیف سیکریٹری اور سیکریٹری بلدیات، جبکہ اسلام آباد کے معاملے میں چیف کمشنر اور ڈپٹی کمشنر الیکشن کمیشن کے روبرو پیش ہوئے۔
یہ بھی پڑھیں: بلدیاتی انتخابات میں تاخیر: الیکشن کمیشن کا خیبر پختونخوا اور اسلام آباد حکام کو نوٹس جاری کرنے کا فیصلہ
چیف سیکریٹری خیبرپختونخوا نے بریفنگ میں بتایا کہ صوبائی حکومت 23 اضلاع کے نقشہ جات پہلے ہی الیکشن کمیشن کو فراہم کرچکی ہے، جن پر حلقہ بندی کا عمل بھی مکمل ہو چکا ہے۔
انہوں نے مزید بتایا کہ الیکشن کمیشن کے یکم جولائی 2026 کے حکم پر عمل کرتے ہوئے باقی 15 اضلاع کے نقشہ جات بھی کمیشن کو مہیا کر دیے گئے ہیں، جبکہ ان میں سے 7 اضلاع کی ویلج اور نیبرہڈ کونسلوں کے نوٹیفکیشن بھی جمع کرا دیے گئے ہیں۔
انہوں نے بتایا کہ باقی 8 اضلاع کی ویلج اور نیبرہڈ کونسلوں کے نوٹیفکیشن صوبائی حکومت کی منظوری کے بعد الیکشن کمیشن کو فراہم کیے جائیں گے۔
الیکشن کمیشن نے چیف سیکریٹری کو ہدایت کی کہ باقی 8 اضلاع کے نوٹیفکیشن 28 جولائی سے قبل ہر صورت جمع کرائے جائیں تاکہ ان اضلاع میں حلقہ بندی کا عمل شروع کیا جاسکے اور بلدیاتی انتخابات بروقت منعقد ہوں۔
یہ بھی پڑھیں: گلگت بلتستان میں بلدیاتی انتخابات کا اعلان، پولنگ 2اگست کو ہوگی
دوسری جانب چیف کمشنر اسلام آباد نے الیکشن کمیشن کو بتایا کہ ٹاؤن کارپوریشنز کی حدود اور ہر ٹاؤن کارپوریشن میں یونین کونسلوں کی تعداد سے متعلق سمری کابینہ کی منظوری کے لیے وزیراعظم آفس بھجوائی گئی تھی، جسے وزیراعظم نے 6 جولائی 2026 کو بذریعہ سرکولیشن وفاقی کابینہ سے منظوری کے لیے پیش کرنے کی اجازت دے دی ہے۔
الیکشن کمیشن نے دونوں کیسوں کی آئندہ سماعت 28 جولائی 2026 مقرر کرتے ہوئے ہدایت کی کہ اس دوران جاری کی گئی ہدایات پر عمل درآمد مکمل کر کے پیشرفت رپورٹ جمع کرائی جائے۔
