مسجد نبویؐ میں نصب تاریخی دھوپ گھڑی (سن ڈائل) آج بھی اسلامی تہذیب کے سائنسی ورثے کی ایک منفرد علامت سمجھی جاتی ہے، جس کے ذریعے جدید گھڑیوں کی ایجاد سے قبل وقت اور نمازوں کے اوقات کا انتہائی درست تعین کیا جاتا تھا۔
مزید پڑھیں:مدینہ منورہ: مسجد نبویؐ کی لائبریری حج کے بعد آنے والے زائرین کے لیے علم و تحقیق کا مرکز بن گئی
سعودی خبر رساں ایجنسی (SPA) کے مطابق یہ دھوپ گھڑی 1335 ہجری میں تعمیر کی گئی تھی۔ یہ سورج کے سائے کی حرکت کو مخصوص نشانات کے ذریعے جانچ کر مسجد نبویؐ کے جغرافیائی محلِ وقوع کے مطابق درست وقت بتاتی تھی اور اپنے دور میں نمازوں کے اوقات معلوم کرنے کا ایک نہایت مؤثر ذریعہ تھی۔
مسجد نبویؐ کے گنبدِ خضرا کے قریب واقع یہ تاریخی دھوپ گھڑی آج بھی اپنی تاریخی اور سائنسی اہمیت برقرار رکھے ہوئے ہے۔ یہ نہ صرف وقت معلوم کرنے کے ارتقا کی ایک اہم منزل کی نمائندگی کرتی ہے بلکہ اس بات کی بھی عکاس ہے کہ مسلمانوں نے عبادات کی ادائیگی کے لیے درست اوقات کے تعین کو ہمیشہ غیر معمولی اہمیت دی۔
مزید پڑھیں:صدیوں پر محیط مسجد نبویؐ کے تعمیراتی ارتقا پر جامع انسائیکلوپیڈیا شائع
ماہرین کے مطابق یہ یادگار اس بات کا بھی ثبوت ہے کہ اسلامی تہذیب میں فلکیات اور ریاضی کے علوم کو عبادات اور عوامی زندگی کی ضروریات پوری کرنے کے لیے مؤثر انداز میں بروئے کار لایا جاتا تھا۔
