بالی ووڈ سپر اسٹار عامر خان اور گوری سپراٹ نے سادگی اور نجی انداز میں اپنی شادی کو یادگار بنا دیا تاہم تقریب کی سب سے زیادہ توجہ گوری کی نایاب انگوٹھی نے حاصل کی جسے معروف لگژری جیولری برانڈ ’کوین‘ نے ڈیزائن کیا۔ انگوٹھی میں مڈغاسکر سے حاصل کیا گیا ایک نایاب قدرتی یاقوت نصب کیا گیا ہے جسے تلاش کرنے میں تقریباً تین ماہ لگے۔
سونے سے تیار کیے گئے تاج نما ڈیزائن میں جڑے اس نایاب یاقوت کے گرد 40 قدرتی ہیرے نصب کیے گئے ہیں۔ رپورٹ کے مطابق اس منفرد انگوٹھی کی تیاری میں 256 گھنٹوں سے زائد وقت صرف ہوا جبکہ 131 ماہر کاریگروں نے اس کی تیاری میں حصہ لیا۔
یہ بھی پڑھیں: عامر خان اور گوری سپراٹ کی شادی کی تصاویر سوشل میڈیا پر وائرل
یہ پہلا موقع نہیں کہ عامر خان نے گوری سپراٹ کو کوئی نایاب زیور تحفے میں دیا ہو۔ رواں سال کے آغاز میں بھی گوری ایک خصوصی انگوٹھی پہنے نظر آئی تھیں جس میں برازیل سے حاصل کیا گیا نایاب ایکوامیرین پتھر اور اس کے گرد 40 قدرتی ہیرے جڑے ہوئے تھے۔
اپنے عروسی لباس کے لیے گوری سپراٹ نے معروف بھارتی ڈیزائنر Sabyasachi Mukherjee کا تیار کردہ نفیس اور سادہ جوڑا منتخب کیا۔ انہوں نے روایتی سرخ عروسی لباس کے بجائے ہلکے رنگ کا لہنگا زیب تن کیا، جس پر سفید پھولوں کی خوبصورت کڑھائی کی گئی تھی۔ اس کے ساتھ انہوں نے زمردی رنگ کے امتزاج سے مزین پولکی زیورات پہن رکھے تھے۔
