بھارتی فلم انڈسٹری کے معروف اداکار عامر خان نے اپنی پارٹنر گوری سپراٹ سے ایک نجی اور سادہ تقریب میں شادی کر لی، جس کی تصاویر بعد ازاں سوشل میڈیا پر وائرل ہو گئیں۔
رپورٹس کے مطابق دونوں نے گزشتہ ہفتے ممبئی میں منعقدہ ایک قریبی خاندانی تقریب کے دوران اسپیشل میرج ایکٹ کے تحت ازدواجی بندھن میں بندھنے کے عہد و پیمان کیے۔ اس تقریب میں صرف قریبی دوستوں، اہل خانہ اور دونوں کے سابقہ رشتوں سے تعلق رکھنے والے بچوں نے شرکت کی۔
یہ بھی پڑھیں: بالی وڈ سپر اسٹار عامر خان تیسری بار رشتہ ازدواج میں منسلک، گوری سپراٹ سے نجی تقریب میں شادی
شادی کے ایک روز بعد گوری سپراٹ نے اپنے انسٹاگرام اکاؤنٹ پر تصاویر شیئر کیں، جن میں وہ شادی کے کاغذات پر دستخط کرتی نظر آتی ہیں۔ انہوں نے اپنی پوسٹ میں لکھا کہ بالآخر یہ لمحہ آ گیا، اور ہیش ٹیگز کے ساتھ اپنی خوشی کا اظہار کیا۔
View this post on Instagram
سوشل میڈیا پر تصاویر وائرل ہونے کے بعد مداحوں کی بڑی تعداد نے دونوں کو مبارکباد پیش کی۔ متعدد صارفین نے جوڑے کے لیے نیک خواہشات کا اظہار کرتے ہوئے ان کی نئی زندگی کے لیے دعائیں دیں۔
یہ بھی پڑھیں: بالآخر عامر خان اور گوری سپراٹ ہاتھوں میں ہاتھ دے کر منظرعام پر آگئے
رپورٹس کے مطابق یہ شادی عامر خان کی تیسری شادی ہے۔ اس سے قبل وہ ریہنا دتہ اور بعد ازاں فلم ساز کرن راؤ سے رشتہ ازدواج میں منسلک رہ چکے ہیں۔ عامر خان کے تین بچے بھی ہیں، جن میں جنید خان، ارا خان اور آزاد راؤ خان شامل ہیں۔
اداکار کی جانب سے تاحال اس شادی سے متعلق باضابطہ تفصیلی بیان جاری نہیں کیا گیا۔
