پاکستان شوبز انڈسٹری کے معروف اداکار احسن خان کے والد انتقال کر گئے جس کی اطلاع اداکار نے اپنے سوشل میڈیا اکاؤنٹ کے ذریعے مداحوں کو دی۔
فوٹو اور ویڈیو شیئرنگ پلیٹ فارم انسٹاگرام پر احسن خان نے اپنے مرحوم والد کے ہمراہ چند یادگار تصاویر شیئر کرتے ہوئے ان کے انتقال پر گہرے دکھ کا اظہار کیا۔
View this post on Instagram
اداکار نے اپنے جذباتی پیغام میں لکھا کہ بعض جدائیاں انسان کو زندگی کی سب سے بڑی حقیقت یاد دلاتی ہیں کہ اس دنیا میں کوئی چیز ہمیشہ رہنے والی نہیں اور ہر شے اللّٰہ تعالیٰ کی امانت ہے۔
احسن خان نے اپنے والد کو ایک شاندار انسان قرار دیتے ہوئے کہا کہ آج وہ جو کچھ بھی ہیں اس میں ان کے والد کا بنیادی کردار ہے۔ انہوں نے مزید لکھا کہ اس مشکل گھڑی میں جن لوگوں نے ان سے رابطہ کیا، محبت اور ہمدردی کا اظہار کیا اور ان کا ساتھ دیا وہ ان سب کے تہہ دل سے شکر گزار ہیں۔
یہ بھی پڑھیں: پاکستانی شوبز کے وہ 10 اداکار جنہوں نے ایک یادگار کردار سے اپنے کیریئر کی سمت بدل دی
اداکار کے مطابق لوگوں کی محبت اور شفقت نے انہیں یہ احساس دلایا کہ وہ اس آزمائش میں تنہا نہیں ہیں اور یہ حمایت ان کے لیے الفاظ سے کہیں زیادہ اہمیت رکھتی ہے۔
احسن خان کے والد کے انتقال کی خبر سامنے آنے کے بعد مداحوں، شوبز شخصیات اور سوشل میڈیا صارفین کی جانب سے ان سے اور ان کے اہلِ خانہ سے دلی تعزیت کا اظہار کیا جا رہا ہے جبکہ مرحوم کے لیے دعائے مغفرت اور اہلِ خانہ کے لیے صبر جمیل کی دعائیں بھی کی جا رہی ہیں۔
