افغان طالبان کے ترجمان ذبیح اللہ مجاہد کی جانب سے افغانستان کو داعش سے پاک کرنے کے دعوے اور پاکستان میں متحرک ہونے کے الزام کو اقوام متحدہ، پاکستان سمیت دیگر عالمی اداروں نے مکمل مسترد کرتے ہوئے محض بے بنیاد الزامات اور گمراہ کن پروپیگنڈا قرار دیا ہے۔
افغانستان میں طالبان رجیم کے ترجمان مولوی ذبیح اللہ مجاہد نے میڈیا کو جاری کردہ اپنے ایک آڈیو پیغام میں جھوٹا اور بے بنیاد دعویٰ کیا ہے کہ افغان سرزمین کو کالعدم داعش سے مکمل طور پر پاک کر دیا گیا ہے اور طالبان فورسز نے اس گروہ کے خلاف فیصلہ کن جنگ لڑی ہے۔
یہ بھی پڑھیں:سیکیورٹی فورسز کے 67 بڑے انٹیلی جنس بیسڈ آپریشنز: داعش کے 50 سے زائد دہشتگرد ہلاک، 100 سے زائد گرفتار
اپنے پیغام میں ذبیع اللہ نے الزام عائد کیا کہ داعش کے عسکریت پسند اب پاکستانی سرزمین کا استعمال کرتے ہیں، وہاں تربیت حاصل کرتے ہیں اور انہیں وہاں سے سرپرستی ملتی ہے، جس کی وجہ سے یہ خطے کی سلامتی کے لیے چیلنج بنے ہوئے ہیں۔
اقوامِ متحدہ کی رپورٹس اور داعش کے آپریشنل مراکز
ذبیح اللہ مجاہد کے اس بیان کو شدید تنقید کا نشانہ بناتے ہوئے اسے ایک ناکام ریاست کے ترجمان کا پروپیگنڈا قرار دیا گیا ہے۔
مولوي ذبیحالله مجاهد:
داعش د پاکستان له خاورې استفاده کوي او هلته یې ملاتړ کېږيد اسلامي امارت ویاند مولوي ذبیحالله مجاهد وايي، افغانستان د داعش خوارجو له شتون څخه پاک شوی او د اسلامي امارت ځواکونو د دغې پدیدې پر وړاندې پرېکنده مبارزه کړې ده.
ښاغلي مجاهد رسنیو ته په یوه غږیز پیغام کې ویلي، چې د خوارجو غړي د پاکستان له خاورې استفاده کوي، هلته روزنه ترلاسه کوي او ملاتړ یې کېږي.
هغه زیاته کړې، چې د داعش ځالې په پاکستان کې دي او دغه ډله له هغه ځایه د سیمې امنیت له ننګونو سره مخ کوي.
یوټیوب لېنک: https://t.co/p1WVPSegEd
— Hurriyat Radio Pashto (@HurriyatPa) November 7, 2026
اقوامِ متحدہ کی سلامتی کونسل کی مانیٹرنگ ٹیم کی مسلسل اور متعدد رپورٹس اس بات کی تصدیق کر چکی ہیں کہ داعش خراسان کے افغانستان میں 2000 کے قریب جنگجو موجود ہیں۔
رپورٹس کے مطابق افغانستان کے صوبے کنڑ، ننگرہار اور ہلمند اس تنظیم کے بنیادی اور اہم آپریشنل مراکز ہیں۔
رپورٹس میں کہا گیا ہے کہ شام میں داعش کے ٹھکانے تباہ ہونے کے بعد داعش کے دہشتگردوں کی ایک بڑی تعداد افغانستان منتقل ہو چکی ہے۔
اس کے علاوہ طالبان کے وہ عسکریت پسند جو حکومت کی جانب سے تنخواہوں کے پے رول پر جگہ حاصل کرنے میں ناکام رہے، انہوں نے بھی داعش خراسان میں شمولیت اختیار کر لی ہے، جس سے اس تنظیم کو مزید تقویت ملی ہے۔
افغانستان کا موجودہ تشخص اور عالمی تشویش
تجزیہ کاروں اور مبصرین کے مطابق موجودہ افغان رجیم دہشتگردوں کو پناہ گاہیں فراہم کر رہی ہے اور خود دہشتگردی کے فروغ کا سبب بن رہی ہے۔
افغانستان اس وقت عالمی اور علاقائی سطح پر دہشتگردی کا مرکز اور داعش کے لیے ایک لانچنگ پیڈ بن چکا ہے، اس کے باوجود افغان حکام اپنے نقائص چھپانے کے لیے پاکستان پر انگلیاں اٹھا رہے ہیں۔
باجوڑ میں افغانستان سے تعلق رکھنے والے داعش خراسان کے 2 دہشتگرد ہلاک
باجوڑ میں سیکیورٹی فورسز کی کارروائی کے دوران افغانستان میں مقیم داعش کے 2 دہشتگردوں کی ہلاکت نے سرحد پار دہشتگرد نیٹ ورکس سے پاکستان کو لاحق سیکیورٹی خطرات کو ایک مرتبہ پھر نمایاں کر دیا ہے۔
اس کارروائی کو ملک میں دہشتگردی کے خاتمے کے لیے سیکیورٹی فورسز کی مسلسل کوششوں کا حصہ قرار دیا گیا ہے۔
ہلاک ہونے والے دونوں کارندوں کا تعلق افغانستان سے تھا
رپورٹس کے مطابق باجوڑ میں کارروائی کے دوران داعش خراسان سے وابستہ 2 ایسے کارندے ہلاک ہوئے جنہیں افغانستان میں قائم دہشتگرد نیٹ ورکس سے منسلک قرار دیا گیا ہے۔
ہلاک ہونے والے دونوں افراد کا افغان شہری ہونا اس امر کی نشاندہی کرتا ہے کہ پاکستان کو درپیش دہشتگردی کے بعض خطرات کی جڑیں سرحد پار افغانستان میں موجود نیٹ ورکس سے وابستہ ہیں۔
اس کارروائی نے سرحد پار دہشتگردی اور افغانستان میں موجود مسلح تنظیموں کی سرگرمیوں کے حوالے سے سیکیورٹی خدشات کو دوبارہ اجاگر کیا ہے۔
داعش خراسان کے خلاف پاکستان کی کارروائیوں کا عالمی اعتراف
باجوڑ کی کارروائی کو داعش خراسان کے خلاف پاکستان کی مسلسل انسداد دہشتگردی مہم کے تناظر میں دیکھا جانا چاہیے۔
پاکستان نے دہشتگردی کے خلاف اپنی کارروائیوں کے ذریعے یہ مؤقف برقرار رکھا ہے کہ ملک میں سرگرم تمام دہشتگرد عناصر کے خلاف بلاامتیاز کارروائی کی جائے گی، خواہ ان کا تعلق کسی بھی تنظیم یا گروہ سے ہو۔
افغانستان میں دہشتگرد پناہ گاہوں کے خلاف مؤثر عالمی اقدامات کا مطالبہ
رپورٹس میں اس امر پر تشویش ظاہر کی گئی ہے کہ پاکستان میں دہشتگرد حملوں میں افغانستان سے منسلک کارندوں کے سامنے آنے کا سلسلہ خطے کی سلامتی کے لیے سنگین چیلنج ہے۔
اس تناظر میں عالمی برادری پر زور دیا گیا ہے کہ وہ افغانستان میں موجود دہشتگرد نیٹ ورکس کے خلاف مربوط حکمت عملی اپنائے، مؤثر انسداد دہشتگردی اقدامات یقینی بنائے اور دہشتگرد پناہ گاہوں کے خاتمے کے لیے ٹھوس اقدامات کرے۔
داعش خراسان کی افرادی قوت اور سابق دہشتگردوں کی نقل مکانی
یورپی یونین ایجنسی برائے پناہ گزین کی فروری 2026 کی افغانستان سے متعلق رپورٹ میں اقوام متحدہ کی مانیٹرنگ ٹیم کے 2025 کے تخمینے کا حوالہ دیتے ہوئے داعش خراسان کے دہشتگردوں کی تعداد تقریباً 2,000 بتائی گئی تھی۔
مزید پڑھیں:افغانستان میں داعش خراسان اب بھی سنگین سیکیورٹی خطرہ ہے، روس کا انتباہ
رپورٹ کے مطابق تنظیم کے جنگجو افغانستان کے شمالی اور شمال مشرقی صوبوں میں منتشر تھے، جبکہ اس کے نیٹ ورکس مختلف علاقوں میں چھوٹے اور غیر مرکزی گروہوں کی شکل میں سرگرم تھے۔
دوسری جانب اقوام متحدہ کی اگست 2026 کی رپورٹ میں شام سے افغانستان آنے والے بعض سابق جنگجوؤں کا بھی ذکر کیا گیا ہے۔
رپورٹ کے مطابق 2025 کے اواخر میں بعض افراد شام سے افغانستان پہنچے، جن میں سے ایک نے نومبر 2025 میں کنڑ میں داعش خراسان کے کمانڈروں سے ملاقات بھی کی تھی۔ تاہم رپورٹ نے شام سے بڑی تعداد میں جنگجوؤں کی افغانستان منتقلی کی تصدیق نہیں کی۔
اقوام متحدہ کی رپورٹ میں طالبان اور ٹی ٹی پی سے متعلق اہم انکشاف
اقوام متحدہ کی اسی رپورٹ میں افغانستان کی طالبان انتظامیہ پر کالعدم تحریک طالبان پاکستان (ٹی ٹی پی) کی حمایت جاری رکھنے کا الزام بھی عائد کیا گیا ہے۔
رپورٹ کے مطابق طالبان انتظامیہ دہشتگرد گروہوں کو پناہ دینے کے الزامات کی تردید کرتی رہی ہے، تاہم رکن ممالک نے افغانستان میں متعدد دہشتگرد تنظیموں کی سرگرمیوں پر تشویش کا اظہار کیا ہے۔
مانیٹرنگ ٹیم کے مطابق افغانستان میں دہشتگرد گروہوں کی سرگرمیاں پڑوسی ممالک اور وسطی ایشیائی خطے کے لیے مسلسل خطرہ ہیں، جبکہ طالبان انتظامیہ کی جانب سے داعش خراسان اور دیگر تنظیموں کے خلاف اقدامات کے باوجود دہشتگردی کے مسئلے پر مکمل قابو نہیں پایا جا سکا۔
