بجٹ سے قبل سولر پینلز پر ٹیکس عائد کیے جانے کی خبروں اور افواہوں کے باعث مارکیٹ میں غیر یقینی صورتحال پیدا ہوئی، جس کے نتیجے میں سولر پینلز کی قیمتوں میں اچانک نمایاں اضافہ دیکھنے میں آیا۔ تاہم بجٹ میں سولر پینلز پر کسی نئے ٹیکس کا اعلان نہ ہونے کے بعد اب مارکیٹ میں قیمتوں میں کمی کا رجحان سامنے آیا ہے۔
سولر مارکیٹ سے وابستہ ڈیلرز کے مطابق سولر پینلز کی قیمتوں میں 5 سے 7 ہزار روپے تک کمی واقع ہوئی ہے۔ ان کا کہنا ہے کہ ٹیکس کے حوالے سے قیاس آرائیوں کے دوران قیمتوں میں جو اضافہ کیا گیا تھا، اب اس میں کمی تو آ رہی ہے لیکن یہ کمی اتنی نہیں جتنی صارفین توقع کر رہے تھے۔
مارکیٹ ذرائع کے مطابق سولر پینلز کی قیمتوں میں کمی کا فائدہ صارفین تک مکمل طور پر منتقل نہیں ہو رہا، کیونکہ امپورٹرز اور سپلائی چین سے وابستہ بعض عناصر قیمتوں میں کمی کو محدود رکھے ہوئے ہیں۔ ڈیلرز کا کہنا ہے کہ بجٹ سے پہلے قیمتوں میں اضافہ بہت تیزی سے کیا گیا، تاہم اب کمی کا عمل نسبتاً سست ہے۔
ماہرین کے مطابق سولر پینلز کی قیمتوں میں مزید کمی کا انحصار عالمی مارکیٹ کی قیمتوں، درآمدی صورتحال اور مقامی طلب و رسد پر ہوگا۔ اور سب سے اہم بات امپورٹرز پر منحصر ہے۔ کہ وہ سولر پینلزکی قیمتوں میں کمی کا اثر مارکیٹ میں بھی آنے دیں۔
اس حوالے سے مزید تفصیلات جانیے اسلام آباد سے زنیرہ رفیع کی رپورٹ میں:
