استحکام پاکستان پارٹی کی رکن پنجاب اسمبلی سارہ احمد نے 16 سال سے کم عمر بچوں کے سوشل میڈیا استعمال کے حوالے سے ایک قرارداد پنجاب اسمبلی میں جمع کرا دی۔
قرارداد میں مطالبہ کیا گیا ہے کہ 16 سال سے کم عمر بچوں کے سوشل میڈیا استعمال پر پابندی عائد کی جائے تاکہ انہیں آن لائن پلیٹ فارمز کے منفی اثرات سے محفوظ رکھا جا سکے۔
یہ بھی پڑھیں: پنجاب اسمبلی میں مولانا فضل الرحمان کے بیان کے خلاف قرارداد جمع، قانونی کارروائی کا مطالبہ
قرارداد کے متن کے مطابق، سارہ احمد نے 16 سال سے کم عمر بچوں کی ویڈیو اور فوٹوگرافی پر بھی پابندی عائد کرنے کا مطالبہ کیا گیا ہے۔
دوسری جانب پاکستان ٹیلی کمیونیکیشن اتھارٹی سے اپیل کی گئی ہے کہ اس مقصد کے لیے مؤثر قانونی اور ریگولیٹری نظام وضع کیا جائے۔
قرارداد کے مطابق بچوں کے نفسیاتی اور اخلاقی تحفظ کے لیے عملی اقدامات کیے جائیں اور پی ٹی اے اس امر کو یقینی بنائے کہ تمام موبائل اور سوشل میڈیا ایپس پر بچوں کے خلاف نقصان دہ یا نامناسب مواد کو فوری طور پر روکا جائے۔
