پاکستانی شوبز کی معروف اداکارہ سجل علی ایک بار پھر اپنی نئی تصاویر کے باعث سوشل میڈیا پر توجہ کا مرکز بن گئی ہیں۔ ساحلِ سمندر پر گزارے گئے خوشگوار لمحات کی جھلکیاں سامنے آتے ہی مداحوں کی جانب سے تعریفوں کا سلسلہ شروع ہوگیا جبکہ بعض صارفین نے ان کے اندازِ لباس پر مختلف آرا کا اظہار کیا۔ تصاویر نے دیکھتے ہی دیکھتے سوشل میڈیا پر نئی بحث چھیڑ دی ہے۔
سجل علی کا شمار پاکستان کی صفِ اول کی اداکاراؤں میں ہوتا ہے۔ وہ اپنی منفرد اداکاری کے باعث شوبز انڈسٹری میں نمایاں مقام رکھتی ہیں جبکہ گزشتہ کچھ عرصے سے وہ اپنے فیشن اور اسٹائل میں نت نئے تجربات بھی کرتی نظر آ رہی ہیں جن پر سوشل میڈیا پر اکثر بحث دیکھنے میں آتی ہے۔
اداکارہ نے حال ہی میں اپنی تعطیلات کے دوران ساحلِ سمندر سے چند تصاویر اپنے انسٹاگرام اکاؤنٹ پر شیئر کیں جن میں وہ بیچ ویئر (سارونگ) میں ملبوس نظر آئیں۔ انہوں نے اپنے لباس کے ساتھ منفرد زیورات کا انتخاب بھی کیا جس نے ان کے انداز کو مزید نمایاں بنایا۔
View this post on Instagram
دلچسپ بات یہ ہے کہ اداکارہ نے اپنی پوسٹ کے ساتھ ایک بنگالی گانا بھی شامل کیا، جسے بنگلہ دیش سے تعلق رکھنے والے مداحوں نے بے حد پسند کیا۔ کئی صارفین نے تبصروں میں بنگلہ دیش سے محبت کا اظہار کیا جبکہ متعدد افراد نے گانے کے انتخاب کو بھی سراہا۔ سجل علی کی یہ تصاویر مداحوں میں غیرمعمولی طور پر مقبول ہو رہی ہیں جس پر تبصروں کا سلسلہ جاری ہے۔
معروف اداکارہ ماہرہ خان نے انہیں ’پُرکشش‘ قرار دیا جبکہ مایا علی نے ’خوبصورت‘ لکھ کر ان کی تعریف کی۔ دوسری جانب بعض سوشل میڈیا صارفین نے اداکارہ کے لباس کو اپنی رائے میں غیر معمولی حد تک بولڈ قرار دیتے ہوئے تنقیدی تبصرے بھی کیے۔
