معروف اداکار ادنان صدیقی نے اپنی صاحبزادی مریم کی گریجویشن پر جذباتی پیغام شیئر کرتے ہوئے والدین پر زور دیا ہے کہ وہ بچوں کی تعلیم کے ساتھ ساتھ ان کی کردار سازی پر بھی خصوصی توجہ دیں۔
ادنان صدیقی نے سوشل میڈیا پر اپنی بیٹی کو گریجویشن کی مبارک باد دیتے ہوئے لکھا کہ ’تم آج جس شخصیت کی مالک ہو، وہی میری سب سے بڑی کامیابی ہے۔ تمہاری گریجویشن ایک اہم سنگِ میل ہے، لیکن تمہاری اقدار ہی تمہاری اصل کامیابی ہیں۔ مجھے تم پر بے حد فخر ہے۔‘
یہ بھی پڑھیں: عدنان صدیقی نے بانسری پر اے آر رحمان اور شنکر جے کشن کی مشہور دھنیں بجا کر صارفین کو حیران کردیا
انہوں نے مزید لکھا کہ ’زندگی میں کچھ لمحے انسان کو مسکرا دیتے ہیں اور کچھ لمحے دل کو شکر ادا کرنے پر مجبور کر دیتے ہیں۔ الحمدللہ! اپنی اولاد کو گریجویشن کرتے دیکھنا انہی یادگار لمحات میں سے ایک ہے۔‘
View this post on Instagram
اداکار نے والدین کی ذمہ داریوں کا ذکر کرتے ہوئے کہا کہ ’والدین برسوں تک فکر کرتے، قربانیاں دیتے، رہنمائی کرتے اور کبھی سوچتے ہیں کہ آیا وہ کافی کر رہے ہیں یا نہیں۔ لیکن ایسے دن یہ احساس دلاتے ہیں کہ ہر بے خوابی، ہر مشکل گفتگو اور اخلاق، نظم و ضبط اور ثابت قدمی کا ہر سبق رائیگاں نہیں گیا۔‘
ادنان صدیقی نے دیگر والدین کو مخاطب کرتے ہوئے کہا کہ ’صرف اپنے بچوں کی تعلیم پر سرمایہ کاری نہ کریں بلکہ ان کے کردار پر بھی توجہ دیں۔ ڈگریاں مواقع فراہم کرتی ہیں، مگر عاجزی، ہمدردی اور دیانت داری یہ طے کرتی ہیں کہ انسان زندگی میں کتنی دور تک جائے گا۔‘
یہ بھی پڑھیں: عدنان صدیقی نے نعمان اعجاز اور ہمایوں سعید کو لیجنڈ قرار دے دیا
اپنے پیغام کے اختتام پر انہوں نے اپنی بیٹی کے لیے دعا بھی کی اور خود کو ایک فخر محسوس کرنے والا والد قرار دیا۔
ادنان صدیقی کی اس پوسٹ کو مداحوں اور شوبز شخصیات کی جانب سے خوب سراہا جا رہا ہے، جنہوں نے ان کے جذباتی پیغام اور بچوں کی تربیت سے متعلق خیالات کی تعریف کی۔
