کالعدم عوامی ایکشن کمیٹی کے ساتھ رابطہ پرامن حل تلاش کرنا تھا جسے توڑ موڑ کر پیش کیا گیا، سید قمر رضا

چیئرمین اوورسیز پاکستانیز فاؤنڈیشن (او پی ایف) سید قمر رضا نے ‘کالعدم عوامی ایکشن کمیٹی’ کی پریس ریلیز کو حقائق کے منافی قرار دیتے ہوئے کہا ہے کہ ان کا رابطہ خالصتاً انسانی ہمدردی اور پرامن حل کی تلاش پر مبنی تھا، جسے غلط رنگ دیا جا رہا ہے۔

پرامن حل کی کوشش، ذاتی مفاد نہیں

سید قمر رضا نے اپنے وضاحتی بیان میں واضح کیا کہ ان کا اقدام کسی تیسرے فریق کی نمائندگی نہیں بلکہ اپنے ادارے اور اپنے لوگوں کے لیے ایک مخلصانہ کاؤش تھی۔

یہ بھی پڑھیں:کالعدم عوامی ایکشن کمیٹی سے وابستہ 150 متحرک افراد شیڈول فورتھ میں شامل، فہرست اور نوٹیفکیشن جاری

انہوں نے کہا کہ کمیٹی کے ساتھ رابطہ صرف اس لیے کیا گیا تاکہ انہیں تشدد سے باز رکھا جائے اور عوامی فلاح کے لیے پرامن راستہ اختیار کیا جا سکے۔ ان کے مطابق کمیٹی کے بیشتر ارکان نے اس مثبت تجویز کو سراہا اور منطقی ردعمل دیا۔

منفی مہمات سے پسپا نہیں ہوں گے

او پی ایف چیئرمین نے اس بات پر افسوس کا اظہار کیا کہ ان کی نیک نیتی پر مبنی کوشش کو بعض عناصر اپنی سستی تشہیر کے لیے استعمال کر رہے ہیں۔

انہوں نے دو ٹوک الفاظ میں کہا کہ ان کی توجہ صرف اور صرف اپنے علاقے اور وہاں کے باشندوں کی فلاح و بہبود پر مرکوز ہے۔ سید قمر رضا نے عزم ظاہر کیا کہ امن اور مفاہمت کے لیے ان کی جاری کوششیں کسی بھی قسم کی منفی مہم یا پروپیگنڈے سے متاثر نہیں ہوں گی۔