نیوزی لینڈ میں جمعہ کو پہلی بار ایک مقامی پرندے میں مہلک ایچ 5 این ون برڈ فلو وائرس کی تصدیق ہوئی ہے۔
یہ پیشرفت اس وقت سامنے آئی ہے جب چند روز قبل ہی ملک میں ایک ہجرت کرنے والے سمندری پرندے میں اس بیماری کا پہلا کیس رپورٹ کیا گیا تھا۔
یہ بھی پڑھیں: برڈ فلو کا خطرہ: دنیا میں پہلی بار نایاب جنگلی جانوروں کی ویکسینیشن کا آغاز
نیوزی لینڈ کے وزیر برائے بایو سیکیورٹی اینڈریو ہوگارڈ نے ایک بیان میں بتایا کہ سویمپ ہیرئیر ہاک، جسے مقامی زبان میں کاہو کہا جاتا ہے، شمالی جزیرے کے وائراراپا علاقے میں ایچ 5 این ون وائرس سے متاثر پایا گیا۔
بدھ کے روز نیوزی لینڈ نے برڈ فلو کے پہلے تصدیق شدہ کیس کا اعلان کیا تھا، جو ویلنگٹن کے قریب پائے جانے والے ایک براؤن اسکیوا نامی ہجرت کرنے والے سمندری پرندے میں سامنے آیا تھا۔
New Zealand reports first H5N1 bird flu case in migratory seabird https://t.co/ugdMf9rPXr pic.twitter.com/5Je1mtMLkr
— Alma Angeles (@AlmaANET25) July 17, 2026
وزیر اینڈریو ہوگارڈ نے کہا کہ اگرچہ کسی مقامی پرندے میں ایچ 5 این ون وائرس کی موجودگی مایوس کن ہے، تاہم ہفتے کے آغاز میں پہلے کیس کی تصدیق کے بعد یہ غیر متوقع نہیں تھا۔
انہوں نے بتایا کہ شکاری باز سردیوں کے موسم میں شکار کی تلاش میں ساحلی علاقوں کا رخ کرتے ہیں اور متاثرہ پرندوں کا شکار کرنے، انہیں کھانے یا مردہ پرندوں کو نوچنے کے دوران وائرس کا شکار ہو سکتے ہیں۔
مزید پڑھیں: برڈ فلو کا خطرہ: دنیا میں پہلی بار نایاب جنگلی جانوروں کی ویکسینیشن کا آغاز
حکام کے مطابق اب تک ملک میں پولٹری یا فارموں میں پالے جانے والے مرغیوں اور دیگر پرندوں میں برڈ فلو کا کوئی کیس سامنے نہیں آیا۔
ادھر صحت کے حکام نے ملک کی 5 انتہائی نایاب نسلوں کے تقریباً 300 افزائشی پرندوں کی ویکسینیشن کا پروگرام شروع کر دیا ہے، جن میں اڑنے سے محروم تاکاہے اور کاکاپو بھی شامل ہیں۔
یاد رہے کہ رواں ماہ کے آغاز میں آسٹریلیا میں بھی پہلی بار ایک مقامی سمندری پرندے میں ایچ 5 این ون وائرس کی تصدیق ہوئی تھی، جبکہ اس سے قبل سامنے آنے والے تمام کیسز ہجرت کرنے والے پرندوں تک محدود تھے۔
