آزاد جموں و کشمیر الیکشن کمیشن کے رکن سید نظیر الحسن گیلانی نے پرنٹنگ پریس آف پاکستان کا دورہ کرکے عام انتخابات کے لیے بیلٹ پیپرز کی چھپائی کے عمل کا جائزہ لیا۔
مزید پڑھیں:آزاد جموں و کشمیر میں انتخابات، الیکشن کمیشن نے انتخابی فہرستیں شائع کردیں
اس موقع پر حکام نے بریفنگ دیتے ہوئے بتایا کہ جموں اور ویلی کے تمام حلقوں کے بیلٹ پیپرز کی چھپائی مکمل ہو چکی ہے، جبکہ آزاد جموں و کشمیر کے 33 انتخابی حلقوں کے بیلٹ پیپرز کی پرنٹنگ تیزی سے جاری ہے اور جلد مکمل کر لی جائے گی۔
سید نظیر الحسن گیلانی نے پرنٹنگ کے عمل پر اطمینان کا اظہار کرتے ہوئے ہدایت کی کہ تمام مراحل مقررہ وقت کے اندر مکمل کیے جائیں تاکہ انتخابی شیڈول کے مطابق بیلٹ پیپرز کی بروقت ترسیل یقینی بنائی جا سکے۔
مزید پڑھیں:آزاد کشمیر الیکشن کمیشن انتخابی تیاریوں میں مصروف، شفاف عمل یقینی بنانے کا اعلان
دورے کے دوران ایس ایس پی سیکیورٹی سید ریاض بخاری نے بیلٹ پیپرز کی حفاظت اور محفوظ ترسیل کے لیے کیے گئے سیکیورٹی انتظامات پر بریفنگ دی، جبکہ الیکشن کمیشن کے رکن نے ہدایت کی کہ پرنٹنگ، پیکنگ، ترسیل اور سیکیورٹی کے تمام مراحل میں شفافیت، احتیاط اور بروقت تکمیل کو یقینی بنایا جائے۔
