امریکا میں ایک خاتون کی ویڈیو سوشل میڈیا پر وائرل ہوگئی ہے جس میں انہوں نے دعویٰ کیا ہے کہ ان کے شوہر کو تعطیلات کے پہلے ہی دن ویڈیو کال کے ذریعے ملازمت سے برطرف کر دیا گیا۔
سوشل میڈیا پر وائرل ویڈیو میں خاتون کا کہنا ہے کہ وہ اور ان کے شوہر دونوں نجی شعبے میں فل ٹائم ملازمت کرتے ہیں اور اس سفر کے لیے کئی ماہ تک بچت کرتے رہے تھے۔
Her husband is fired in the middle of a vacation. pic.twitter.com/iXuz5uaYOa
— Dr.L (@DrAlmarielao) July 16, 2026
خاتون کے مطابق ہوائی کے مقامی وقت کے مطابق صبح تقریباً 9 بجے ان کے شوہر کو ان کے منیجر کی کال موصول ہوئی جس میں انہیں مائیکروسافٹ ٹیمز (Microsoft Teams) پر فوری میٹنگ میں شامل ہونے کے لیے کہا گیا۔ ان کا کہنا تھا کہ کمپنی کو معلوم تھا کہ ان کے شوہر پورا ہفتہ تعطیلات پر ہیں اور یہ ان کی چھٹی کا پہلا مکمل دن تھا۔
انہوں نے دعویٰ کیا کہ جیسے ہی ان کے شوہر آن لائن میٹنگ میں شامل ہوئے، چند ہی منٹ بعد انہیں ملازمت سے برطرف کیے جانے کی اطلاع دے دی گئی۔
یہ بھی پڑھیں: امریکی ملازمتی ویزوں میں بھارتی فراڈ پکڑا گیا، درخواستیں اور ڈگریاں جعلی نکلیں
خاتون نے اس فیصلے کے وقت اور انداز پر شدید افسوس کا اظہار کرتے ہوئے سوال اٹھایا کہ آیا کمپنی یہ فیصلہ ان کی تعطیلات ختم ہونے تک مؤخر نہیں کر سکتی تھی۔ ان کا کہنا تھا کہ انہوں نے اس سفر کے لیے سخت محنت اور طویل عرصے تک بچت کی تھی مگر ایک فون کال نے ان کی خوشیوں کو ماند کر دیا۔
وائرل ویڈیو پر سوشل میڈیا صارفین کی بڑی تعداد نے ردِعمل دیتے ہوئے جوڑے سے ہمدردی کا اظہار کیا۔ ایک صارف کا کہنا تھا کہ ’اسی لیے میں چھٹیوں کے دوران دفتر کی کوئی کال یا ای میل نہیں اٹھاتا۔ دفتر میں کچھ بھی ہو جائے میں واپسی پر ہی جانوں گا۔ کوئی نوکری میری چھٹی خراب کرنے کے قابل نہیں‘۔
یہ بھی پڑھیں: ملازمتوں کے لیے خطرہ ڈیلیوری روبوٹس اب شہریوں کا راستہ بھی روکنے لگے
ایک اور صارف نے کہا کہ اسی لیے اگر آپ اپنی موجودہ ملازمت سے خوش بھی ہوں تب بھی نئی ملازمت کی پیشکشوں پر غور کرنے میں کبھی ہچکچاہٹ محسوس نہ کریں۔ کمپنی ایک لمحے میں آپ کو ایسے فارغ کر دیتی ہے جیسے آپ کبھی اس کا حصہ ہی نہ تھے۔
ایک سوشل میڈیا صارف کا کہنا تھا کہ اسی لیے میں سمجھ نہیں پاتا کہ لوگ اپنی نوکری کے لیے خود کو کیوں اتنا تھکا دیتے ہیں۔ جب چھٹی ملے تو کام سے دور رہیں اور سکون سے وقت گزاریں۔
