سابق پاکستانی کرکٹر شعیب اختر کی ’صاحبزادی‘ سوشل میڈیا پر اچانک سے موضوع بحث بن چکی ہیں۔
اپنی تیز رفتار بولنگ کے باعث دنیائے کرکٹ میں ’راولپنڈی ایکسپریس‘ کا لقب پانے والے شعیب اختر نے حال ہی میں عائلین شیخ نامی ایک نوجوان خاتون کے ساتھ لی گئی اپنی تصویر شیئر کی جس میں انہوں نے اشارہ کیا کہ وہ ان کی دختر ہیں۔ تصویر کے کیپشن میں ان کا لکھنا تھا کہ ’اپنی بیٹی کے ساتھ چِل موڈ میں‘۔
یاد رہے کہ شعیب اختر نے 23 جولائی 2014 کو رباب خان کے ساتھ شادی کی تھی اور ان کے پہلے بیٹے محمد میکائیل علی کی پیدائش 7 نومبر 2016 کو ہوئی جب کہ ان کا دوسرا بیٹا 14 جولائی 2019 کوپیدا ہوا تھا۔ اس سے قبل کبھی شعیب اختر کی جانب سے اپنی کسی بیٹی کے ہونے کا تذکرہ نہیں سنا گیا تھا۔
گو مذکورہ پوسٹ میں شعیب اختر نے تصویر میں ان کے ساتھ نظر آنے والی نوجوان خاتون کو اپنی بیٹی تو کہا لیکن فی الحال یہ واضح نہیں ہے کہ وہ ان کی حقیقی دختر ہیں یا پھر منہ بولی بیٹی ہیں۔
اس طرح پہلی مرتبہ شعیب اختر کی جانب سے اپنی بیٹی کی تصویر شیئر کرنے پر زیادہ تر مداحوں نے مسرت کا اظہار کیا تاہم کچھ ایسے بھی تھے جنہوں نے بیٹی کے ’انکشاف‘ پر حیرت بھی ظاہر کی جب کہ کچھ نے استفسار کیا کہ ان کی بیٹی اتنی جلدی بڑی کیسے ہوگئیں۔
ایک مداح نے فیس بک پر تصویر کے نیچے اپنے تبصرے میں لکھا کہ کیا یہ سچ میں شعیب اختر کی بیٹی ہیں؟
ایک صارف نے حیرت کا اظہار کیا کہ شعیب اختر کی شادی تو سنہ 2014 میں ہوئی تھی، بیٹی اتنی جلدی بڑی ہوگئی!
واضح رہے کہ شعیب اختر نے انسٹاگرام اسٹوری میں تصویر میں موجود نوجوان خاتون کے اکاؤنٹ کو ٹیگ کرتے ہوئے ان کا نام عائلین شیخ بتایا ہے۔
