کراچی کی ڈسٹرکٹ ایسٹ پولیس نے نوجوان نسل میں منشیات پھیلانے والے مبینہ نیٹ ورک کے خلاف بڑی کارروائی کرتے ہوئے انمول عرف پنکی کے بھائی کو گرفتار کر لیا۔ جمشید کوارٹرز پولیس نے خفیہ اطلاع پر کارروائی کے دوران ملزم کے قبضے سے کروڑوں روپے مالیت کی منشیات برآمد کرنے کا دعویٰ کیا ہے۔
گرفتاری اور برآمدگی
ترجمان ایسٹ پولیس کے مطابق گھوڑا چورنگی کے قریب خفیہ اطلاع پر ناکہ بندی کی گئی، جہاں سے ملزم کامران مراد کو گرفتار کیا گیا۔ پولیس کے مطابق اس کے قبضے سے 2 کلوگرام سے زائد اعلیٰ معیار کی چرس، آدھا کلوگرام کیمیکل ڈرگ، ایک موبائل فون، پرس، شناختی کارڈ اور منشیات کی فروخت سے حاصل ہونے والی نقد رقم برآمد ہوئی۔
مزید پڑھیں: کراچی: انمول پنکی گینگ کے 2 مبینہ کارندے گرفتار، میتھ اور کوکین برآمد
ملزم کا مبینہ نیٹ ورک
تفتیشی حکام کے ایک ذریعے نے بتایا کہ گرفتار ملزم کامران مراد اپنی بہن انمول عرف پنکی کے مبینہ منشیات فروش نیٹ ورک کا سرگرم رکن ہے۔ ذریعے کے مطابق یہ نیٹ ورک کراچی کے مختلف علاقوں میں چرس، آئس اور ہیروئن کی سپلائی میں ملوث رہا ہے۔
پولیس کا مؤقف
پولیس کے مطابق ملزم کا بنیادی ہدف تعلیمی اداروں کے طلبا اور نوجوان تھے۔ پولیس کا کہنا ہے کہ وہ نوجوانوں کو آئس اور ہیروئن جیسے مہلک نشے کا عادی بنا کر انہیں جرائم کی دلدل میں دھکیل رہا تھا تاکہ اس کا منشیات کا کاروبار مسلسل فروغ پاتا رہے۔
سابقہ ریکارڈ
پولیس کے مطابق کامران مراد اس سے قبل بھی منشیات فروشی اور اسمگلنگ کے متعدد مقدمات میں گرفتار ہو چکا ہے۔ ضمانت پر رہائی کے بعد اس نے دوبارہ مبینہ طور پر منشیات کا کاروبار شروع کر دیا۔ حالیہ کارروائی کے بعد تھانہ جمشید کوارٹرز میں اس کے خلاف منشیات ایکٹ کے تحت 2 نئے مقدمات درج کر لیے گئے ہیں۔
مزید تفتیش
پولیس حکام کا کہنا ہے کہ ملزم سے تفتیش کا دائرہ وسیع کر دیا گیا ہے۔ انمول عرف پنکی کے مبینہ نیٹ ورک، اس کے سپلائرز اور کراچی میں موجود دیگر ٹھکانوں سے متعلق معلومات حاصل کی جا رہی ہیں۔ پولیس کے مطابق جلد مزید گرفتاریاں بھی متوقع ہیں اور منشیات فروشوں کے خلاف بلاامتیاز کریک ڈاؤن جاری رہے گا۔
ذرائع کیا کہتے ہیں؟
ذرائع نے نام ظاہر نہ کرنے کی شرط پر دعویٰ کیا کہ معاملہ بظاہر نظر آنے سے کہیں زیادہ پیچیدہ ہے۔ اس کے مطابق ارمغان اور پنکی کے مبینہ نیٹ ورکس میں بنیادی فرق صرف منشیات کے معیار کا تھا، ایک نسبتاً کم جبکہ دوسرا اعلیٰ معیار کی منشیات فروخت کرتا تھا۔
اس کیس میں اہم پیشرفت ایک معروف اداکار کے بیٹے ساحر کی گرفتاری کے بعد ہوئی۔ اس کی تفتیش کے دوران فیضی نامی شخص کو حراست میں لیا گیا، جس نے مبینہ طور پر بتایا کہ پنکی نامی خاتون مقامی سطح پر منشیات کا ایک مخصوص ویریئنٹ خود تیار کرتی تھی۔
مزید دعویٰ ہے کہ فیضی کی تفتیش کے دوران منشیات کے دھندے سے وابستہ کئی اہم افراد کے نام سامنے آئے، جن میں پنکی، اس کا بھائی اور بعض دیگر بااثر شخصیات بھی شامل تھیں۔
مزید پڑھیں: کراچی: انمول پنکی گینگ کے 2 مبینہ کارندے گرفتار، میتھ اور کوکین برآمد
جب تفتیش میں بااثر افراد کے نام سامنے آنے لگے تو متعلقہ افسران کو سختی سے ہدایت کی گئی کہ انٹروگیشن کی تفصیلات کسی صورت لیک نہ ہوں۔ اس کے بقول، واضح کیا گیا کہ اگر معلومات باہر آئیں تو متعلقہ اہلکاروں کے خلاف سخت محکمانہ کارروائی کی جائے گی، چنانچہ تفتیش میں سامنے آنے والے نام منظرعام پر نہیں آ سکے۔
ذریعے نے یہ بھی دعویٰ کیا کہ ارمغان کیس کی تفتیش کے دوران ہی پنکی اور اس کے بھائی کا نام سامنے آ چکا تھا، تاہم اس وقت کارروائی معمول کے مطابق آگے بڑھتی رہی۔ اس کے مطابق بعد ازاں بعض افراد نے اپنے نام سامنے آنے سے روکنے کے لیے مختلف سطح پر رابطے کیے اور متعلقہ افسران پر دباؤ ڈالنے کی کوشش بھی کی۔
اب اس معاملے کی تحقیقات ایک ایسے ادارے کے پاس ہیں جو سیاسی دباؤ سے نسبتاً آزاد سمجھا جاتا ہے، اس لیے اگر تفتیش اسی سمت میں آگے بڑھی تو مستقبل میں اس نیٹ ورک سے جڑے مزید بااثر افراد کے نام بھی سامنے آ سکتے ہیں۔
