پیراماؤنٹ اسکائی ڈانس اور وارنر برادرز ڈسکوری کے درمیان ہونے والے بڑے انضمام کے معاہدے کو امریکی عدالت نے عارضی طور پر روک دیا ہے۔ عدالت کے حکم کے بعد یہ اربوں ڈالر کا میڈیا معاہدہ تاخیر کا شکار ہوگیا ہے۔
یہ بھی پڑھیں: پیراماؤنٹ کا ٹرمپ سے خفیہ تصفیہ: سینیٹر وارن نے رشوت کی تحقیقات کا مطالبہ کر دیا
امریکی ریاست کیلیفورنیا کی وفاقی عدالت نے پیراماؤنٹ کی جانب سے وارنر برادرز ڈسکوری کے حصول کے عمل کو کم از کم 14 روز کے لیے روکنے کا حکم دیا۔ یہ فیصلہ 12 امریکی ریاستوں کی جانب سے دائر مقدمے کے بعد سامنے آیا، جس میں مؤقف اختیار کیا گیا تھا کہ انضمام سے میڈیا صنعت میں مقابلہ کم ہوسکتا ہے۔
ریاستوں نے عدالت میں خدشہ ظاہر کیا کہ دونوں بڑی میڈیا کمپنیوں کے یکجا ہونے سے فلم، ٹی وی اور تفریحی مواد کے شعبے میں صارفین کے لیے اختیارات محدود ہوسکتے ہیں اور مارکیٹ پر چند بڑی کمپنیوں کا اثر بڑھ سکتا ہے۔
پیراماؤنٹ اسکائی ڈانس نے عدالت کے خدشات کو مسترد کرتے ہوئے کہا ہے کہ یہ انضمام کمپنی کو ٹیکنالوجی کمپنیوں اور دیگر بڑے اسٹریمنگ پلیٹ فارمز کے مقابلے میں مضبوط بنائے گا۔
یہ بھی پڑھیں: نیٹ فلکس کا وارنر برادرز ڈسکوری کو 83 ارب ڈالر میں خریدنے کا فیصلہ
اس مجوزہ معاہدے کی مالیت تقریباً 110 ارب ڈالر بتائی جا رہی ہے، جس کے بعد پیراماؤنٹ کے ساتھ وارنر برادرز، ایچ بی او، سی این این اور دیگر بڑے میڈیا اثاثے ایک ہی گروپ کے تحت آسکتے ہیں۔
عدالت نے اگلی سماعت 3 اگست کو مقرر کی ہے، جہاں فیصلہ کیا جائے گا کہ انضمام کو مزید روکا جائے گا یا نہیں۔ اگر معاہدے میں مزید تاخیر ہوئی تو پیراماؤنٹ کو مالی جرمانوں کا سامنا بھی کرنا پڑ سکتا ہے۔
