افغانستان کے مشرقی صوبے نورستان میں شدید سیلاب نے تباہی مچا دی، جس کے نتیجے میں کم از کم 23 افراد جاں بحق جبکہ تقریباً 100 افراد لاپتا ہوگئے ہیں۔
غیر ملکی خبر ایجنسی کے مطابق ریسکیو اہلکاروں کو ملبے تلے دبے افراد تک پہنچنے میں مشکلات کا سامنا ہے، جبکہ دور دراز علاقے پرون میں مقامی افراد لکڑی کے ڈنڈوں اور اپنے ہاتھوں سے لاپتا افراد کی تلاش میں مصروف ہیں۔
یہ بھی پڑھیں: افغانستان میں سیلاب کے باعث 300 سے زیادہ افراد جاں بحق، ہزاروں مکانات تباہ
سیلابی ریلے نے صوبائی دارالحکومت پرون میں متعدد دکانیں تباہ کر دیں، جبکہ بڑے بڑے پتھر عمارتوں سے ٹکرا گئے۔ امدادی کارکن بیلچوں اور ہاتھوں کی مدد سے ملبہ ہٹا کر متاثرین کو تلاش کررہے ہیں۔
مقامی افراد کے مطابق یہ سیلاب انتہائی خوفناک تھا۔ ایک فارماسسٹ فرید گل ظہیر نے بتایا کہ انہوں نے اپنی زندگی میں ایسا خطرناک سیلاب نہیں دیکھا، ہر طرف چیخ و پکار تھی اور ایسا محسوس ہو رہا تھا جیسے زلزلہ آیا ہو۔
نورستان کے حکام کے مطابق پرون کے میئر اور کئی سرکاری اہلکار بھی لاپتا افراد میں شامل ہیں۔ سیلاب سے ہوٹل، بازار اور دکانیں مکمل طور پر تباہ ہوگئیں۔
یہ بھی پڑھیں: پاکستان اور افغانستان میں شدید بارشیں اور سیلاب، کم از کم 45 افراد جاں بحق
افغان ہلال احمر کے ترجمان جمعہ خان نائل نے صورتحال کو انتہائی تباہ کن قرار دیتے ہوئے کہا کہ رضاکار متاثرہ علاقوں میں خوراک، پانی اور خیمے فراہم کر رہے ہیں۔
افغان وزارت دفاع نے امدادی سرگرمیوں میں مدد کے لیے فوج تعینات کر دی ہے، جبکہ اقوام متحدہ نے بھی صورتحال کا جائزہ لینا شروع کردیا ہے۔
ماہرین کے مطابق افغانستان موسمیاتی تبدیلی اور سیلابی صورتحال سے شدید متاثر ہونے والے ممالک میں شامل ہے، جہاں حالیہ برسوں میں قدرتی آفات میں اضافہ ہوا ہے۔
