وزیر مملکت برائے خزانہ و ریلوے بلال اظہر کیانی نے کہا ہے کہ اگر مہاجرین جموں و کشمیر اپنی نمائندگی کی نشستوں کا حق برقرار رکھنا چاہتے ہیں تو انہیں مسلم لیگ (ن) کے انتخابی نشان شیر پر مہر لگانا ہوگی۔
مزید پڑھیں:نواز شریف کا وزیراعظم شہباز شریف سے انوکھی ’خواہش‘ کا اظہار
جہلم میں آزاد جموں و کشمیر کے حلقہ ایل اے 42 ویلی 3 کے امیدوار سید شوکت شاہ اور حلقہ ایل اے 39 جموں 6 کے امیدوار راجہ صدیق کی انتخابی مہم کے سلسلے میں محلہ سلیمان، پارس چک خاصہ، رجی پور، کھرالہ اور پکھوال میں کارنر میٹنگز سے خطاب کرتے ہوئے بلال اظہر کیانی نے کہا کہ مسلم لیگ (ن) کا مؤقف بالکل واضح ہے کہ مہاجرین جموں و کشمیر کی 12 مخصوص نشستیں برقرار رہنی چاہئیں۔
انہوں نے کہا کہ مسلم لیگ (ن) کی کامیابی دراصل مہاجرین جموں و کشمیر کی کامیابی ہوگی، جبکہ شیر پر مہر آزاد کشمیر میں تیز رفتار ترقی اور عوامی خوشحالی کی ضمانت ثابت ہوگی۔
مہاجرین جموں و کشمیر اپنی نشستوں کا حق برقرار رکھنا چاہتے ہیں تو صرف شیر پر مہر لگائیں، وزیر مملکت خزانہ اور ریلوے بلال اظہر کیانی کا جموں 6 میں مہاجرین جموں و کشمیر کے اجتماع سے خطاب @KhUsamaIqbal @KhawajaMAsif pic.twitter.com/U16aovvMX3
— Media Talk (@mediatalk922) July 22, 2026
وزیر مملکت نے کہا کہ جو لوگ اپنے فیصلوں پر قائم نہیں رہ سکتے، وہ عوام سے کیے گئے وعدے بھی پورے نہیں کر سکتے۔
مزید پڑھیں:آزاد کشمیر کے عوام کا دیرینہ خواب پورا ہونے کے قریب، تاریخ میں پہلی بار الیکٹرک بسیں چلیں گی
اس موقع پر حلقہ ایل اے 39 جموں 6 سے مسلم لیگ (ن) کے امیدوار راجا صدیق نے خطاب کرتے ہوئے کہا کہ قائد مسلم لیگ (ن) نواز شریف اور وزیراعلیٰ پنجاب مریم نواز کا آزاد کشمیر میں فقید المثال استقبال کشمیری عوام کی ان سے محبت کا اظہار ہے۔ انہوں نے دعویٰ کیا کہ وعدے صرف نواز شریف ہی پورے کرتے ہیں۔
تقریب کے دوران مختلف برادریوں اور علاقے کے عمائدین نے بھی مسلم لیگ (ن) کے امیدواروں کی حمایت کا اعلان کیا۔
