ٹیکنالوجی کمپنی ایپل اپنی ہارڈویئر فروخت کے طریقہ کار میں بڑی تبدیلی لانے کی تیاری کر رہی ہے۔ میڈیا رپورٹس کے مطابق کمپنی امریکا میں ‘Apple Upgrade’ کے نام سے نیا لیزنگ پروگرام متعارف کرانے جا رہی ہے، جس کے تحت صارفین آئی فون، میک، آئی پیڈ اور ایپل واچ کم ماہانہ اقساط پر حاصل کر سکیں گے اور ضرورت پڑنے پر انہیں جلد اپ گریڈ بھی کر سکیں گے۔
بلوم برگ کی رپورٹ کے مطابق یہ پروگرام 28 جولائی سے امریکا میں شروع کیے جانے کا امکان ہے۔ اس اسکیم کے تحت صارفین ماہانہ ادائیگی کے عوض ڈیوائس لیز پر حاصل کریں گے جبکہ لیز کی مدت کے دوران وہ نئی ڈیوائس پر منتقل ہونے، مکمل ادائیگی کرکے ڈیوائس اپنی ملکیت میں لینے یا معاہدہ مکمل ہونے پر اسے اپنے پاس رکھنے کا انتخاب کر سکیں گے۔ پروگرام کی فنانسنگ سویڈن کی مالیاتی ٹیکنالوجی کمپنی کلارنا (Klarna) فراہم کرے گی۔
یہ بھی پڑھیں: بھارت میں سائبر سیکیورٹی کی بڑی ناکامی، آئی فون 18 کی لانچ سے قبل ایپل کا حساس ڈیٹا چوری
رپورٹ کے مطابق یہ پروگرام ایپل کے موجودہ iPhone Upgrade Program اور روایتی فنانسنگ ماڈل کی جگہ لے سکتا ہے جس کے ذریعے کمپنی ڈیوائسز کی فروخت کو ملکیت کے بجائے لیزنگ ماڈل پر منتقل کرنا چاہتی ہے۔
اطلاعات کے مطابق اس پروگرام میں زیادہ تر آئی فون، میک، آئی پیڈ اور ایپل واچ ماڈلز شامل ہوں گے، تاہم Apple Watch SE، بنیادی آئی پیڈ، iPhone 16 اور MacBook Neo جیسے انٹری لیول ماڈلز اس سہولت سے مستثنیٰ ہوں گے۔ اسی طرح تعلیمی اداروں اور کاروباری صارفین کے لیے کی جانے والی خریداری بھی پروگرام کا حصہ نہیں ہوگی، جبکہ AppleCare بھی اس اسکیم میں شامل نہیں ہوگا۔
یہ بھی پڑھیں: آئی فون صارفین کیلئے خوشخبری، آئی او ایس 26 کے پوشیدہ فیچرز سامنے آگئے
رپورٹ میں بتایا گیا ہے کہ آئی فون اور ایپل واچ کے لیے لیز کی مدت 24 ماہ جبکہ میک اور آئی پیڈ کے لیے 36 ماہ رکھی جائے گی۔ پروگرام میں شمولیت سے قبل صارفین کا سافٹ کریڈٹ چیک بھی کیا جائے گا۔
ماہرین کے مطابق ایپل کا یہ اقدام ایسے وقت میں سامنے آیا ہے جب صارفین پہلے کے مقابلے میں اسمارٹ فونز اور لیپ ٹاپ زیادہ عرصے تک استعمال کر رہے ہیں، جس کے باعث نئی ڈیوائسز کی فروخت کی رفتار سست ہوئی ہے۔ کم ماہانہ اقساط کے ذریعے کمپنی صارفین کو زیادہ تیزی سے نئی ڈیوائسز اپ گریڈ کرنے کی ترغیب دینا چاہتی ہے۔
یہ بھی پڑھیں: آئی فون کی فروخت نے تاریخ کی بلند ترین سطح حاصل کر لی
تاہم ایپل نے تاحال Apple Upgrade پروگرام کی باضابطہ تصدیق نہیں کیجبکہ کمپنی اور کلارنا نے اس حوالے سے رائٹرز کی جانب سے تبصرے کی درخواست پر فوری ردعمل بھی نہیں دیا۔
