عالمی تنازعات کا حل صرف سفارتکاری سے ہی ممکن ہے، اسحاق ڈار اور کاجا کالاس کے درمیان اہم ملاقات

نائب وزیراعظم اور وزیر خارجہ سینیٹر محمد اسحاق ڈار نے منیلا میں 33 ویں ’آسیان ریجنل فورم‘ (اے آر ایف ) کے موقع پر یورپی یونین کی اعلیٰ نمائندہ برائے خارجہ امور و سیکیورٹی پالیسی اور یورپی کمیشن کی نائب صدر کاجا کالاس سے اہم ملاقات کی ہے۔

یہ بھی پڑھیں:یورپی یونین کی خارجہ پالیسی سربراہ کاجا کالاس اسٹریٹجک مذاکرات کے لیے یکم جون کو اسلام آباد پہنچیں گی

ترجمان دفتر خارجہ کی جانب سے جاری اعلامیے کے مطابق ملاقات میں دونوں رہنماؤں نے ’پاکستان-ای یو اسٹریٹجک انگیجمنٹ پلان‘ کے تحت دوطرفہ تعاون کو مزید آگے بڑھانے کے مشترکہ عزم کا اعادہ کیا۔

سفارت کاری کی اہمیت اور عالمی معاشی اثرات

ملاقات کے دوران علاقائی پیش رفت پر تبادلہ خیال کرتے ہوئے دونوں رہنماؤں نے اس بات پر زور دیا کہ خاص طور پر امریکا اور ایران کی موجودہ صورتحال کے تناظر میں پائیدار سفارت کاری ہی امن و استحکام کا واحد اور دیرپا راستہ ہے۔

انہوں نے اس کشیدگی کے علاقائی سیکیورٹی، عالمی توانائی کی منڈیوں، سمندری تحفظ اور تجارت و سپلائی چینز پر پڑنے والے اثرات پر تشویش کا اظہار کرتے ہوئے مسلسل بات چیت اور بین الاقوامی قوانین کی پاسداری کی اہمیت کو اجاگر کیا۔

جی ایس پی پلس اور اقتصادی شراکت داری

نائب وزیراعظم اسحاق ڈار نے یورپی یونین کے ساتھ اقتصادی شراکت داری کی اہمیت کو اجاگر کرتے ہوئے ’جی ایس پی پلس‘ فریم ورک کے تحت تمام بین الاقوامی کنونشنز پر مؤثر عملدرآمد کے لیے پاکستان کے کامل عزم کا اعادہ کیا۔

مزید پڑھیں:اسحاق ڈار کی یورپی یونین خارجہ امور کی نمائندے سے ٹیلی فونک گفتگو، خطے کی صورتحال پر تبادلہ خیال

اس موقع پر یورپی یونین کی اعلیٰ نمائندہ کاجا کالاس نے بھی اسلام آباد میں منعقدہ ’پاک ای یو اسٹریٹجک ڈائیلاگ‘ کے 8 ویں دور کے اپنے حالیہ دوطرفہ دورے کو گرمجوشی سے یاد کیا۔