صوبہ سندھ میں کراچی ریجن کے سرکاری کالجوں میں تدریسی اور غیر تدریسی عملے کے لیے ڈریس کوڈ پر سختی کر دی گئی ہے۔
ڈائریکٹوریٹ آف کالج ایجوکیشن نے غیر رسمی لباس پہن کر ڈیوٹی پر آنے پر پابندی عائد کرتے ہوئے تمام کالجوں کے سربراہان کو ہدایات دی ہیں کہ احکامات پر مکمل عمل درآمد یقینی بنایا جائے، جبکہ خلاف ورزی کرنے والوں کے خلاف قواعد کے مطابق کارروائی ہوگی۔
یہ بھی پڑھیں:پنجاب حکومت کا اسکول و کالجز میں گرمیوں کی چھٹیوں میں کمی کا فیصلہ
غیر رسمی لباس پر پابندی
ڈائریکٹوریٹ آف کالج ایجوکیشن کراچی ریجن کی جانب سے جاری سرکلر میں کہا گیا ہے کہ بعض ملازمین، خصوصاً مرد عملہ، ٹی شرٹ، جینز، تنگ لباس، چپل اور ‘فینسی سن گلاسز’ پہن کر ڈیوٹی پر آ رہا ہے، جو سرکاری تعلیمی اداروں کے پیشہ ورانہ وقار سے مطابقت نہیں رکھتا، اس لیے ایسے لباس کی سرکاری اوقات کار میں اجازت نہیں ہوگی۔
تدریسی عملے کے لیے ہدایات
سرکلر کے مطابق مرد اساتذہ، بالخصوص سرکاری گرلز کالجوں میں تعینات اساتذہ، کو مکمل آستین والی قمیص کے ساتھ رسمی پتلون یا روایتی شلوار قمیص پہننے کی ہدایت کی گئی ہے۔ لیکچر کے دوران اکیڈمک گاؤن اور مناسب رسمی جوتے پہننے کی بھی تاکید کی گئی ہے۔
خواتین تدریسی عملے کو بھی باوقار، باحیا اور پیشہ ورانہ لباس پہننے کی ہدایت دی گئی ہے تاکہ تدریسی پیشے کے وقار اور تعلیمی ماحول کا احترام برقرار رکھا جا سکے۔
مزید پڑھیں:سندھ کے پرائمری اسکولوں میں ہندو طلبا کے لیے مذہبی کتب متعارف کرانے کا فیصلہ
انہیں بھی تدریس کے دوران اکیڈمک گاؤن اور رسمی جوتے پہننے کا بھی اپنی ذمہ داریوں کے مطابق صاف ستھرا، باوقار اور سرکاری نوعیت کا لباس پہننے کی ہدایت کی مشورہ دیا گیا ہے۔
غیر تدریسی عملے کے لیے بھی ضابطہ
غیر تدریسی ملازمین، خصوصاً گرلز کالجوں میں تعینات عملے، کو بھی اپنی ذمہ داریوں کے مطابق صاف ستھرا، باوقار اور سرکاری نوعیت کا لباس پہننے کی ہدایت کی گئی ہے۔
پرنسپلز کو سخت عمل درآمد کی ہدایت
ڈائریکٹوریٹ نے کراچی ریجن کے تمام سرکاری کالجوں کے پرنسپلز کو ہدایت کی ہے کہ وہ یہ احکامات تمام ملازمین تک پہنچائیں اور ان پر ’من و عن‘عمل درآمد یقینی بنائیں۔
سرکلر میں واضح کیا گیا ہے کہ سرکاری اوقات کار کے دوران ٹی شرٹ، جینز، تنگ لباس اور ‘فینسی سن گلاسز’ پہننا تمام ملازمین کے لیے سختی سے ممنوع ہوگا، جبکہ خلاف ورزی کی صورت میں متعلقہ سرکاری قواعد اور محکمانہ ضوابط کے تحت کارروائی عمل میں لائی جائے گی۔
