چین کے مشرقی صوبے ژے جیانگ کے دارالحکومت ہانگژو میں منعقد ہونے والا 34واں قومی کتاب میلہ کامیابی کے ساتھ اختتام پذیر ہوگیا، جہاں چار روز کے دوران مجموعی طور پر 1.18 ارب یوان (تقریباً 17 کروڑ 37 لاکھ امریکی ڈالر) مالیت کی کتابوں اور اشاعتی مواد کی خرید و فروخت ریکارڈ کی گئی۔
سرکاری خبر رساں ادارے شنہوا کے مطابق ملک بھر سے ایک ہزار سے زائد اشاعتی اداروں، پبلشرز اور کتاب فروشوں نے میلے میں شرکت کی، جبکہ تقریباً پانچ لاکھ 60 ہزار افراد نے میلے کا رخ کیا، جس سے چین میں مطالعے اور کتاب بینی کے بڑھتے ہوئے رجحان کی عکاسی ہوتی ہے۔
The 34th National Book Fair concluded on Monday in Hangzhou, capital of east China's Zhejiang Province, recording total transactions worth 1.18 billion yuan (around 173.71 million U.S. dollars), organizers said. pic.twitter.com/hO247X1H4R
— Economic Daily, China (@EDNewsChina) July 28, 2026
منتظمین کے مطابق کتاب میلے میں تقریباً 10 لاکھ مختلف عنوانات پر مشتمل کتابیں اور دیگر اشاعتی مواد نمائش کے لیے پیش کیا گیا۔ اس دوران ایک ہزار سے زائد ادبی، علمی اور ثقافتی سرگرمیوں کا بھی انعقاد کیا گیا، جن میں مصنفین سے ملاقاتیں، کتابوں کی رونمائی، مذاکرے، بچوں کے لیے مطالعاتی پروگرام اور عوامی مطالعے کے فروغ سے متعلق خصوصی نشستیں شامل تھیں۔
یہ بھی پڑھیں:چینی ٹیکنالوجی کے خلاف واشنگٹن کا نیا محاذ، روبوٹس پر پابندی، بیجنگ کا سخت ردعمل
چین کا قومی کتاب میلہ ملک کی اشاعتی صنعت کی سب سے بڑی سالانہ تقریبات میں شمار ہوتا ہے، جہاں نہ صرف نئی کتابیں متعارف کرائی جاتی ہیں بلکہ مصنفین، ناشرین، محققین اور قارئین کو ایک دوسرے سے رابطے اور خیالات کے تبادلے کا موقع بھی ملتا ہے۔ حکام کے مطابق اس میلے کا مقصد عوام میں مطالعے کے فروغ، علمی و ادبی سرگرمیوں کی حوصلہ افزائی اور اشاعتی صنعت کی ترقی کو مزید تقویت دینا ہے۔
