پاکستان ٹیلی وژن (پی ٹی وی) کی سابق نیوز کاسٹر اور ممتاز سماجی شخصیت جہاں آرا معین اسلام آباد میں انتقال کر گئیں۔
جہاں آرا معین نے 1973 میں پاکستان ٹیلی وژن نیوز سے اپنے کیریئر کا آغاز کیا جہاں وہ ابتدا میں انگریزی خبروں کی بیک گراؤنڈ کمنٹری سے وابستہ رہیں۔ بعد ازاں اپنی صلاحیتوں کے باعث وہ جلد ہی پی ٹی وی کی باقاعدہ نیوز کاسٹر بن گئیں۔
یہ بھی پڑھیں: معروف نیوز کاسٹر عشرت فاطمہ نے ریڈیو پاکستان چھوڑنے کی اصل وجہ بتادی
وہ 1999 تک پی ٹی وی نیوز کے ساتھ وابستہ رہیں اور خبروں کی درست ادائیگی، تلفظ اور پیشہ ورانہ انداز کے حوالے سے ایک نمایاں مقام رکھتی تھیں۔ وہ حالاتِ حاضرہ سے باخبر رہنے اور خبروں کی تیاری میں بھرپور محنت کے لیے جانی جاتی تھیں۔
جہاں آرا معین نے تدریس کے شعبے میں بھی خدمات انجام دیں اور مختلف جامعات میں بطور وزیٹنگ فیکلٹی ممبر کام کرتی رہیں۔ اس کے علاوہ وہ اقوام متحدہ، ورلڈ بینک، یونیسکو اور یو این ڈی پی سمیت عالمی اداروں کے ساتھ بطور کنسلٹنٹ بھی وابستہ رہیں۔
یہ بھی پڑھیں: پی ٹی وی کی معروف نیوز کاسٹر عشرت فاطمہ کے انتقال کی افواہیں، اینکر نے خود وضاحت کردی
ان کے انتقال پر صحافتی، سماجی اور تعلیمی حلقوں کی جانب سے گہرے دکھ اور افسوس کا اظہار کیا گیا ہے۔ مختلف شخصیات نے جہاں آرا معین کی خدمات کو خراجِ تحسین پیش کرتے ہوئے کہا کہ وہ ایک باصلاحیت نیوز کاسٹر، بہترین استاد اور سماجی شعبے میں متحرک شخصیت تھیں جن کی خدمات کو ہمیشہ یاد رکھا جائے گا۔
