کینیڈا میں سرحد پار منشیات اسمگلنگ کے خلاف بڑے آپریشن کے دوران متعدد بھارتی نژاد ٹرک ڈرائیوروں کو گرفتار کر لیا گیا۔ حکام نے کارروائی کے دوران 1.7 ٹن منشیات برآمد کی ہیں، جن کی مالیت 13 کروڑ 90 لاکھ ڈالر بتائی جا رہی ہے۔
کینیڈا کی سیکیورٹی اور قانون نافذ کرنے والے اداروں نے منشیات اسمگلنگ کے ایک بین الاقوامی نیٹ ورک کے خلاف بڑے پیمانے پر کارروائی کرتے ہوئے متعدد بھارتی نژاد ٹرک ڈرائیوروں کو گرفتار کر لیا ہے۔
یہ بھی پڑھیں:بھارت کینیڈا کیخلاف غیر ملکی جاسوسی میں ملوث اہم ممالک میں شامل ہے، کینیڈا کی خفیہ ایجنسی کا اعتراف
بھارتی نشریاتی ادارے این ڈی ٹی وی کے مطابق یہ کارروائی کینیڈا کے ’پروجیکٹ بی‘ کے تحت کی گئی، جس کا مقصد غیر قانونی منشیات کی ترسیل میں ملوث نیٹ ورکس کا خاتمہ کرنا ہے۔
تحقیقات کے دوران حکام نے 1.7 ٹن غیر قانونی منشیات برآمد کیں، جن کی مجموعی مالیت تقریباً 13 کروڑ 90 لاکھ ڈالر بتائی گئی ہے۔ کینیڈین حکام کے مطابق تحقیقات سے معلوم ہوا کہ منشیات کی اسمگلنگ کا یہ نیٹ ورک تجارتی ٹرانسپورٹ کے ذریعے کام کر رہا تھا اور اس میں بھارتی نژاد افراد ملوث تھے۔
رپورٹ کے مطابق گرفتار افراد سے مزید تفتیش جاری ہے تاکہ نیٹ ورک کے دیگر ارکان اور اس کے بین الاقوامی روابط کا سراغ لگایا جا سکے۔
یہ بھی پڑھیں:بھارتی دہشتگردی سے متاثر پاکستان اور کینیڈا کے وزرائے خارجہ کی ملاقات، انیتا آنند کے پاکستان دورے کے مقاصد کیا ہیں؟
کینیڈین امور کے ماہر وید دھیسی کا کہنا ہے کہ بھارتی نژاد بعض مجرمانہ گروہ دنیا کے مختلف حصوں میں سرگرم بڑے جرائم پیشہ نیٹ ورکس کا حصہ ہیں اور منشیات کی اسمگلنگ سمیت متعدد سنگین جرائم میں ملوث رہے ہیں۔
دوسری جانب کینیڈین حکام نے اس کارروائی کو سرحد پار منظم جرائم کے خلاف اہم پیش رفت قرار دیتے ہوئے کہا ہے کہ ایسے نیٹ ورکس کے خلاف کارروائیاں آئندہ بھی جاری رہیں گی۔
