وزیراعظم محمد شہباز شریف نے ایف بی آر اصلاحات پر ہفتہ وار جائزہ اجلاس کی صدارت کرتے ہوئے مختلف شعبوں میں ٹیکس کی استعداد کا سائنسی بنیادوں پر تخمینہ لگانے، ٹیکس چوری کی روک تھام اور پیداواری شعبوں کی ڈیجیٹل نگرانی کا نظام رواں سال دسمبر تک مکمل فعال بنانے کی ہدایت کی ہے۔
وزیراعظم نے ہدایت کی کہ پاور سیکٹر کے تعاون سے غیر رسمی معاشی سرگرمیوں اور ٹیکس چوری میں ملوث افراد و کاروبار کی نشاندہی کرکے ان کے خلاف قانونی کارروائی کی جائے۔ انہوں نے کہا کہ پاکستان کی تاریخ میں پہلی مرتبہ چینی کے پیداواری شعبے اور ایف بی آر کے اعداد و شمار میں ہم آہنگی اس بات کا ثبوت ہے کہ ایف بی آر کا ٹریکنگ نظام مؤثر انداز میں کام کر رہا ہے، جس پر چیئرمین ایف بی آر اور ان کی ٹیم مبارکباد کی مستحق ہے۔
انہوں نے کہا کہ ایمانداری سے ٹیکس ادا کرنے والے افراد اور کاروباری ادارے ملک کا قیمتی سرمایہ ہیں اور حکومت آئندہ بھی برآمدی اور مقامی صنعت کو زیادہ سے زیادہ سہولت فراہم کرتی رہے گی۔
وزیراعظم نے ہدایت کی کہ چیئرمین ایف بی آر اور سینئر افسران ہر ماہ کے پہلے ہفتے کراچی میں موجود ہوں تاکہ کاروباری برادری کے مسائل بروقت سنے اور حل کیے جا سکیں۔ انہوں نے ٹیکسٹائل، مشروبات، اسٹیل، پولٹری، خوردنی تیل و گھی اور ٹائرز کے شعبوں میں بھی دسمبر تک ڈیجیٹل ٹریکنگ نظام فعال کرنے کی ہدایت دی۔
وزیراعظم شہباز شریف نے ایف بی آر اصلاحات پر ہفتہ وار جائزہ اجلاس کی صدارت کرتے ہوئے مختلف شعبوں میں ٹیکس کی استعداد کا سائنسی بنیادوں پر تخمینہ لگانے، ٹیکس چوری کی روک تھام اور پیداواری شعبوں کی ڈیجیٹل نگرانی کا نظام رواں سال دسمبر تک مکمل فعال بنانے کی ہدایت کی ہے۔@KulAalam pic.twitter.com/td49uMclx5
— Media Talk (@mediatalk922) July 29, 2026
اجلاس کو بتایا گیا کہ چینی، سیمنٹ، تمباکو، ٹائلز اور کھاد کے شعبوں میں ٹریکنگ سسٹم مکمل طور پر فعال ہے، جبکہ مزید پانچ شعبوں میں اس کا نفاذ آخری مراحل میں ہے، جہاں 700 ارب روپے سے زائد ٹیکس استعداد موجود ہے۔ مزید نو پیداواری شعبوں میں بھی ٹریکنگ نظام متعارف کرایا جا رہا ہے، جس سے 560 ارب روپے کی اضافی ٹیکس استعداد سے فائدہ اٹھایا جا سکے گا۔
اجلاس کو ایف بی آر میں افرادی قوت، تربیت، میرٹ پر تقرریوں، پیئر ریویو نظام، شفافیت اور تھرڈ پارٹی آڈٹ کے حوالے سے اصلاحات پر بھی بریفنگ دی گئی۔ بتایا گیا کہ 957 تھرڈ پارٹی آڈیٹرز تعینات کیے جا چکے ہیں، جبکہ کسٹمز کے فیس لیس نظام کے لیے 280 گڈز ایویلیوایٹرز کی بھرتی جاری ہے۔
بریفنگ میں مزید بتایا گیا کہ متبادل تنازعاتی حل (ADRC) فورم کے تحت جون 2026 تک 377 درخواستوں میں سے 152 کو 90 روز کے اندر نمٹا کر 54 ارب روپے کی ٹیکس وصولی ممکن بنائی گئی، جبکہ ٹیکس مقدمات میں غیر ضروری قانونی چارہ جوئی کم کرنے کے لیے کیس اسکرونٹی کمیٹی بھی قائم کی جا رہی ہے۔
وزیراعظم نے ہدایت کی کہ ایف بی آر میں تقرریاں اور تبادلے صرف میرٹ کی بنیاد پر کیے جائیں، اچھی کارکردگی دکھانے والے افسران کی فہرست مرتب کی جائے تاکہ یومِ آزادی پر انہیں ایوارڈز سے نوازا جا سکے، جبکہ کسٹمز بانڈڈ ویئر ہاؤسز کا فوری تھرڈ پارٹی آڈٹ اور ویلیڈیشن بھی کرائی جائے۔
