وفاقی وزیر داخلہ محسن نقوی نے صدر مملکت آصف علی زرداری سے ملاقات کی، جس میں ملک کی مجموعی امن و امان کی صورتحال، خصوصاً خیبرپختونخوا اور بلوچستان میں سیکیورٹی کی صورت حال اور دہشت گردی کے خلاف جاری اقدامات پر تفصیلی غور کیا گیا۔
وفاقی وزیر داخلہ محسن نقوی نے جمعرات کو صدر مملکت آصف علی زرداری سے ملاقات کی، جس میں ملک کی مجموعی امن و امان کی صورتحال پر تفصیلی تبادلہ خیال کیا گیا۔
ملاقات کے دوران خیبرپختونخوا اور بلوچستان کی سیکیورٹی صورتحال، دہشت گردی کے خلاف جاری کارروائیوں اور امن و استحکام کے لیے کیے جانے والے اقدامات کا خصوصی جائزہ لیا گیا۔
یہ بھی پڑھیں:تربت میں جدید ایف سی اسپتال کا افتتاح، مقامی آبادی بھی علاج کی سہولت سے مستفید ہوگی: محسن نقوی
وزیر داخلہ محسن نقوی نے صدر مملکت کو خیبرپختونخوا اور بلوچستان میں امن و امان کی موجودہ صورتحال اور دہشت گردی کے خلاف جاری آپریشنز سے متعلق بریفنگ دی۔
اس موقع پر صدر آصف علی زرداری نے دہشتگردی کے خلاف جنگ میں پاک افواج، قانون نافذ کرنے والے اداروں اور پولیس کی بہادری، پیشہ ورانہ صلاحیتوں اور قربانیوں کو خراجِ تحسین پیش کیا۔
صدر مملکت نے کہا کہ دہشتگردی کے مکمل خاتمے اور ملک میں پائیدار امن کے قیام کے لیے پوری قوم اپنی سیکیورٹی فورسز کے شانہ بشانہ کھڑی ہے۔ انہوں نے اس عزم کا اعادہ کیا کہ ریاست دہشت گردی کے ناسور کے خاتمے کے لیے تمام ضروری اقدامات جاری رکھے گی۔
