نائب وزیراعظم و وزیر خارجہ سینیٹر محمد اسحاق ڈار اور ترکیہ کے وزیر خارجہ ہاکان فیدان کے درمیان ٹیلیفونک رابطہ ہوا، جس میں غزہ، مقبوضہ مغربی کنارے اور مشرقی یروشلم کی تازہ صورتحال پر تشویش کا اظہار کرتے ہوئے فلسطینی عوام کی حمایت جاری رکھنے کے عزم کا اعادہ کیا گیا۔
نائب وزیراعظم و وزیر خارجہ سینیٹر محمد اسحاق ڈار نے ترکیہ کے وزیر خارجہ ہاکان فیدان سے ٹیلیفون پر گفتگو کی، جس میں دونوں رہنماؤں نے خطے اور عالمی سطح پر پیش آنے والی حالیہ پیشرفت پر تبادلہ خیال کیا۔
دفتر خارجہ کے مطابق گفتگو کے دوران غزہ اور مقبوضہ مغربی کنارے میں اسرائیلی فوجی کارروائیوں، مقبوضہ مشرقی یروشلم میں مسجد اقصیٰ کے احاطے کی بار بار ہونے والی بے حرمتی اور فلسطینی علاقوں میں بگڑتی ہوئی انسانی صورتحال پر گہری تشویش کا اظہار کیا گیا۔
یہ بھی پڑھیں:اسحاق ڈار اور کویتی وزیر خارجہ کے درمیان اہم ملاقات، دوطرفہ تعلقات پر تبادلہ خیال
دونوں وزرائے خارجہ نے فلسطینی عوام کے جائز اور قانونی حقوق کی غیرمتزلزل حمایت جاری رکھنے کے عزم کا اعادہ کیا اور اس بات پر زور دیا کہ خطے میں امن کے لیے فلسطینی عوام کے حقوق کا تحفظ ناگزیر ہے۔
اس موقع پر اردن کی جانب سے عرب اور اسلامی ممالک کا اجلاس بلانے کی تجویز پر بھی تبادلہ خیال کیا گیا، جس کا مقصد فلسطینی عوام کی حمایت میں مشترکہ سفارتی کوششوں کو مزید مؤثر بنانا ہے۔
پاکستان اور ترکیہ نے اس عزم کا اظہار کیا کہ وہ فلسطینی مسئلے پر قریبی رابطے اور مشاورت جاری رکھتے ہوئے بین الاقوامی سطح پر مشترکہ سفارتی تعاون کو فروغ دیں گے۔
