الپائن کلب آف پاکستان (اے سی پی) نے اتوار کو بتایا ہے کہ ریسکیو ٹیم نے براڈ پیک پر تقریباً 5,700 میٹر کی بلندی پر معروف نیپالی نژاد برطانوی کوہ پیما نرمل پرجا کی لاش تلاش کر لی ہے۔
یہ پیشرفت اس واقعے کے 3 روز بعد سامنے آئی ہے جب برفانی تودہ گرنے کے بعد نرمل پرجا اور ان کی ٹیم کے دیگر ارکان لاپتا ہوگئے تھے۔
یہ بھی پڑھیں: براڈ پیک پر برفانی تودہ گرنے سے معروف کوہ پیما نرمل پرجا سمیت 10 کوہ پیما لاپتا، ریسکیو آپریشن جاری
ہفتے کے روز مہم کے منتظم ادارے ایلیٹ ایکسپیڈ نے اعلان کیا تھا کہ اس مہم میں شریک پاکستانی کوہ پیما سہیل ساقی سمیت تمام کوہ پیما حادثے میں جاں بحق ہوگئے ہیں۔
اس سے قبل 3 کوہ پیماؤں کی لاشیں برآمد کی جا چکی تھیں، جبکہ ایک اور لاش امریکی کوہ پیما کی ہونے کا شبہ ظاہر کیا گیا تھا۔
Rest in peace, Nirmal "Nimsdai" Purja. pic.twitter.com/4yhySQEAvz
— WarMonitor (@WarMonitorINTL) August 1, 2026
الپائن کلب آف پاکستان کی جانب سے جاری بیان میں کہا گیا کہ انتہائی افسوس کے ساتھ اطلاع دی جاتی ہے کہ زمینی ریسکیو ٹیم براڈ پیک پر تقریباً 5,700 میٹر کی بلندی پر نرمل پرجا تک پہنچ گئی ہے۔
ٹیم نے اس مقام پر مزید 3 لاشیں بھی دیکھی ہیں، تاہم ان کی شناخت ابھی تک نہیں ہو سکی۔
بیان کے مطابق زمینی ریسکیو ٹیم لاشوں کو جاپانی کیمپ تک منتقل کرے گی، جبکہ دشوار گزار راستوں کے باعث امدادی کارروائیاں انتہائی مشکل حالات میں جاری ہیں۔
مزید پڑھیں: براڈ پیک سانحہ: 3 غیر ملکی کوہ پیماؤں کی لاشیں مل گئیں، 7 کی تلاش جاری
الپائن کلب نے واضح کیا کہ یہ معلومات ابتدائی فیلڈ رپورٹس پر مبنی ہیں، جن کی مزید تصدیق ہونا باقی ہے، اور عوام سے اپیل کی گئی ہے کہ غیر مصدقہ اطلاعات پھیلانے سے گریز کریں۔
اس سے قبل الپائن کلب آف پاکستان کے جنرل سیکریٹری ایاز شگری نے بتایا تھا کہ زمینی ریسکیو ٹیم آپریشن کے لیے ایڈوانس بیس کیمپ کی جانب روانہ ہو چکی ہے۔
ان کے مطابق پہاڑ کا دشوار گزار راستہ، برفانی تودوں کا خطرہ اور انتہائی کھڑی ڈھلوانیں امدادی کارروائیوں میں بڑی رکاوٹ ہیں، جبکہ خراب موسمی حالات کے باعث ہیلی کاپٹروں کا استعمال بھی ممکن نہیں ہو سکا۔
