سابق وزیراعظم آزاد کشمیر اور استحکام پاکستان پارٹی آزاد کشمیر کے صدر سردار تنویر الیاس نے آزاد جموں و کشمیر قانون ساز اسمبلی کے انتخابات کے تیسرے مرحلے کے بائیکاٹ کا اعلان کردیا ہے۔
مزید پڑھیں: کسی کو شکایت ہے تو الیکشن کمیشن سے رجوع کرے، ن لیگ نے آزاد کشمیر میں دھاندلی کا الزام مسترد کردیا
سردار تنویر الیاس نے وزیراعظم پاکستان شہباز شریف اور وزیراعظم آزاد کشمیر فیصل ممتاز راٹھور کو آزاد کشمیر میں افراتفری کی صورتحال کا ذمہ دار قرار دیتے ہوئے مطالبہ کیاکہ حالیہ واقعات کی تحقیقات کے لیے ایک غیر جانبدار کمیشن قائم کیا جائے۔
انہوں نے کہا کہ وادی نیلم سمیت پورے آزاد کشمیر میں انتخابات کا ماحول نہیں بلکہ ہر دو کلومیٹر پر ناکے اور بندشیں موجود ہیں۔
انہوں نے کہاکہ مظفرآباد ڈویژن میں بدترین دھاندلی کے ذریعے انتخابی نتائج تبدیل کیے گئے۔
سردار تنویر الیاس نے مزید کہاکہ استحکام پاکستان پارٹی نے ان حالات کے پیش نظر انتخابات کے تیسرے مرحلے کے بائیکاٹ کا فیصلہ کیا ہے، جبکہ آئندہ ایک سے دو روز میں پارٹی اپنے آئندہ کے لائحہ عمل کا بھی اعلان کرےگی۔
واضح رہے کہ سردار تنویر الیاس نیلم ویلی کے حلقہ اپر نیلم سے استحکام پاکستان پارٹی کے امیدوار تھے، جہاں سے انہیں شکست کا سامنا کرنا پڑا ہے۔
مزید پڑھیں: آزاد کشمیر انتخابات: مسلم لیگ ن نے مظفرآباد ڈویژن کے لیے حکمت عملی طے کرلی
اس کے علاوہ وہ پونچھ سے بھی 2 نشستوں پر انتخابات میں حصہ لے رہے تھے، تاہم اب انہوں نے الیکشن کے تیسرے مرحلے کا بائیکاٹ کردیا ہے۔
