اسلام آباد ٹریفک پولیس نے 5 اگست کو یومِ استحصال کشمیر کے موقع پر منعقد ہونے والی واک کے لیے خصوصی ٹریفک پلان جاری کردیا ہے۔
ٹریفک پولیس کے مطابق یوم استحصال کشمیر کے موقع پر ڈی چوک سے فارن آفس تک واک منعقد ہوگی، جس کے باعث ڈی چوک سے فارن آفس تک دونوں اطراف ہر قسم کی ٹریفک کا داخلہ بند رہے گا۔
یہ بھی پڑھیں: یوم استحصال کشمیر پر صدر زرداری اور وزیراعظم شہباز شریف کے خصوصی پیغامات
ٹریفک پولیس نے شہریوں سے اپیل کی ہے کہ غیر ضروری پریشانی سے بچنے کے لیے جاری کردہ ٹریفک پلان پر عمل کریں اور متبادل راستے اختیار کریں۔
جاری کردہ پلان کے مطابق سیکریٹریٹ سے آنے والی ٹریفک ایوب چوک کے راستے ایمبیسی روڈ استعمال کرے، جبکہ سرینہ ہوٹل سے آنے والی ٹریفک بھی ایمبیسی روڈ سے گزرے۔
یہ بھی پڑھیں: یوم استحصال کشمیر: پاکستان کا کشمیریوں کی حمایت جاری رکھنے کا عزم
اسی طرح بری امام سے آنے والی ٹریفک کے لیے نیو بری امام روڈ مختص کی گئی ہے، جبکہ کلب روڈ سے آنے اور جانے والی ٹریفک کو ایمبیسی روڈ اور سیونتھ ایونیو استعمال کرنے کی ہدایت کی گئی ہے۔
اسلام آباد ٹریفک پولیس نے شہریوں سے کہا ہے کہ مزید ٹریفک معلومات اور تازہ صورتحال کے لیے اس کے سوشل میڈیا صفحات اور ایف ایم 92.4 سے رابطے میں رہیں۔
