یومِ استحصالِ کشمیر کے موقع پر جموں و کشمیر لبریشن سیل کے زیرِ اہتمام مظفرآباد میں بڑی احتجاجی ریلی نکالی گئی، جس میں سرکاری افسران، حریت رہنماؤں، وکلا، سول سوسائٹی کے نمائندوں اور شہریوں کی بڑی تعداد نے شرکت کی۔
مزید پڑھیں:یومِ استحصالِ کشمیر: جموں و کشمیر کی خصوصی آئینی حیثیت بحال کی جائے، سابق وزیر اعلیٰ محبوبہ مفتی
ریلی وزیراعظم سیکریٹریٹ سے شروع ہو کر یادگارِ شہدا پر اختتام پذیر ہوئی۔ شرکا نے بھارت کے خلاف اور آزادیٔ کشمیر کے حق میں بھرپور نعرے بازی کی، جبکہ ان کے ہاتھوں میں حقِ خودارادیت کے حق میں پلے کارڈز اور بینرز بھی موجود تھے۔
ریلی سے خطاب کرتے ہوئے مقررین نے 5 اگست 2019 کو کشمیر کی تاریخ کا سیاہ ترین دن قرار دیتے ہوئے کہا کہ بھارت کی جانب سے مقبوضہ جموں و کشمیر کی خصوصی آئینی حیثیت ختم کرنے کے اقدامات اقوامِ متحدہ کی سلامتی کونسل کی قراردادوں اور بین الاقوامی قوانین کی کھلی خلاف ورزی ہیں۔
یومِ استحصالِ کشمیر کے موقع پر جموں و کشمیر لبریشن سیل کے زیرِ اہتمام مظفرآباد میں بڑی احتجاجی ریلی نکالی گئی، جس میں سرکاری افسران، حریت رہنماؤں، وکلا، سول سوسائٹی کے نمائندوں اور شہریوں کی بڑی تعداد نے شرکت کی۔@KhUsamaIqbal @AbidAandleeb pic.twitter.com/3ArwLBokYd
— Media Talk (@mediatalk922) August 5, 2026
مقررین نے کہا کہ بھارتی اقدامات کشمیری عوام کے حوصلے پست نہیں کر سکتے اور کشمیری عوام اپنی جدوجہدِ آزادی کو منطقی انجام تک پہنچانے کے لیے پرعزم ہیں۔
انہوں نے عالمی برادری اور اقوامِ متحدہ سے مطالبہ کیا کہ وہ مسئلہ کشمیر کے منصفانہ حل اور کشمیری عوام کو ان کا حقِ خودارادیت دلانے کے لیے مؤثر کردار ادا کریں۔
مزید پڑھیں: یومِ استحصالِ کشمیر: عالمی برادری بھارتی مظالم کا نوٹس لے، چیئرمین سینیٹ یوسف رضا گیلانی
ریلی کے شرکا نے پاکستان اور آزاد کشمیر کے عوام کی جانب سے کشمیری عوام کے ساتھ مکمل یکجہتی کا اظہار کیا، جبکہ اختتام پر شہدائے کشمیر کو خراجِ عقیدت پیش کیا گیا اور ان کے درجات کی بلندی اور کشمیر کی آزادی کے لیے خصوصی دعا بھی کی گئی۔
