پاکستان نے 45 سال سے زائد عمر کی آئی ٹی ایف ماسٹرز ورلڈ ٹیم چیمپئن شپ میں شاندار آغاز کرتے ہوئے طاقتور امریکی ٹیم کو 0-3 سے شکست دے دی ہے۔ 30 ممالک کے 300 سے زائد کھلاڑیوں پر مشتمل اس عالمی ایونٹ میں پاکستانی کھلاڑیوں نے سنگلز اور ڈبلز کے تمام مقابلوں میں بہترین کھیل کا مظاہرہ کیا۔
پاکستانی ٹیم کی جانب سے پہلے سنگلز میں پاکستان ٹینس فیڈریشن کے صدر اور معروف ٹینس سٹار اعصام الحق قریشی نے حریف کھلاڑی ووجٹیک بریٹیک کو آئوٹ کلاس کرتے ہوئے 2-6 اور 3-6 سے کامیابی حاصل کی۔
دوسرے سنگلز میں پاکستان کے نمبر ون ٹینس پلیئر عقیل خان اور جان چیسورتھ کے درمیان اعصاب شکن مقابلہ ہوا، جس میں عقیل خان نے 2-6، 6-1 اور 4-6 سے فتح سمیٹ کر ٹیم کو برتری دلائی۔
ڈبلز مقابلے میں شہریار سلامت اور ہادی حسین کی جوڑی نے پہلا سیٹ گنوانے کے بعد شاندار کم بیک کیا۔ انہوں نے امریکی جوڑی جیون ویسٹ اور گیلرمو کوسن کو 6-1، 1-6 اور فیصلہ کن ٹائی بریک میں 6-10 سے شکست دے کر کلین سویپ مکمل کیا۔
امریکا کے خلاف اس یکطرفہ کامیابی نے پاکستان کو راؤنڈ رابن مرحلے میں زبردست مومینٹم فراہم کیا ہے۔ پاکستانی ٹیم اپنے اگلے اہم مقابلے میں کینیڈا کا سامنا کرے گی، جس میں کامیابی حاصل کرنے والی ٹیم ناک آؤٹ مرحلے کے لیے کوالیفائی کر جائے گی۔
